د کانونو او پټرولیم وزارت وايي، د جوزجان په یتیمتاق سیمه کې د ۷.۵ مېلیونه ډالرو په ارزښت د دوو څاهگانو د کېندلو هوکړهلیکونه یې لاسلیک کړي دي.
له یاد وزارت څخه په خپره شوې خبرپاڼه کې ویل شوي، د داوطلبو شرکتونو د پروپوزلونو له ارزونې وروسته د سفیر سونداج شرکت، چې ښه تخنیکي او مالي وړتیا لري د ۷.۵مېلیونه ډالرو په قیمت سره گټونکی اعلان شوی دی.: «خوښ یو چې د گازو د دوو څاهگانو تړون د یوې رڼې پروسې په ترڅ کې له ترکي شرکت سره لاسلیک کوو. یاد شرکت به د ۱۶۵۰ مترو په ژوروالي سره د یو کال په اوږدو کې د کېندنې چارې بشپړې کړې. ان شاءالله د یادو څاهگانو تر کېندنې وروسته به هره ورځ ۳۰۰۰۰۰ متر مکعب گاز استخراج شي، چې ورځني عواید یې ۶۰۰۰۰ زره امریکایي ډالره کېږي.»
په خبرپاڼه کې ویل شوي، د یادو گازو څخه به د برېښنا د تولید په برخه کې هم کار واخیستل شي، چې ډېر ژر به د هېواد د نورو گاز لرونکو څاهگانو د کېندنې تړونونه هم لاسلیک شي.: «بهرنۍ کمپنۍ غواړي چې د طوطي میدان د گازو سیمه کې يو مېليارد ډالره پانگونه وکړي او زموږ هېواد به ډېر ژر د نفتو او گازو د صادرونکو هېوادونو په کتار کې شامل شي. د هرات د ۲۳۰۰۰ کیلومتره مربع نفتي سیمې چې په درې زونونو او یوولس بلاکونو باندې وېشل شوې ده د دغو څاهگانو په کېندلو سره به د هېوادوالو لپاره د کار زمینه برابره شي او استخراج شوي گاز به د کورونو، اصنافو، د برېښنا د تولید، CNG او ښیښې جوړولو کارخونې او د هېواد د اقتصادي پراختیا لپاره وکارول شي.»
په هېواد کې گڼ کانونه لا هم استخراج شوي نه دي. د اقتصادي چارو کارپوهان وايي، که د هېواد ټول کانونه په رڼه بڼه استخراج شي؛ نو لرې نه ده چې په لسیزه کې د افغانانو په ژوند کې مثبت بدلونونه راشي او هم ورسره د بېکارۍ کچه راټیټه شي.