د مخابراتو او معلوماتي ټکنالوژۍ وزارت وايي، په کندوز کې د ۱۳ مخابراتي سایټونو د جوړولو چارې په عملي ډول پیل شوې.
د یاد وزارت ویاند عنایت الله الکوزی وايي، د مخابراتو او معلوماتي ټکنالوژۍ وزرات د پلان له مخې کندوز کې د دغه وزارت د آترا ادارې د ټي ډي اف لسمې پروژې په مرسته د سلام مخابراتي شبکې ۱۳ سايټونه چې سروې یې څه موده وړاندې بشپړه شوې وه د جوړولو چارې پيل شوې. :«د یادو سایټونو د عملي چارو په بشپړېدو سره به د کندوز اړوندو سیمو اوسېدونکي د افغان ټېلیکام مخابراتي شرکت د سلام شبکې لوړ کیفیت لرونکي مخابراتي او انټرنېټي خدمتونو ته لاسرسی ولري او په دې برخه کې به خپلې ستونزې حل کړي.»
د الکوزي په خبره، په کندوز کې د محرومو سیمو د پوښښ لپاره هلې ځلې روانې دي او ډېر ژر به د دغه ولایت په ټولو برخو کې مخابراتي سایټونه جوړ شي.
اوسمهال د سلام دولتي مخابراتي شبکې سربېره څلور خصوصي شبکې فعاله دي؛ خو کاروونکي یې له لوړو بیو او ټیټ کیفیت څخه شکایت کوي.
په هېواد کې د بشپړ امنیت سربېره بیا هم د مخابراتي او انټرنېټي بیو کې د پاموړ کموالی نه دی راغلی او لا هم په ټیټ کیفیت او لوړه بیه مخابراتي خدمتونه وړاندې کېږي.