په عربي نړۍ کې وتلی خبریال، لیکوال او د سیاسي چارو شنونکي ډاکټر احمد موفق زیدان د ریاست الوزراء له اداري مرستیال سره په لیدنه کې ویلي، چې افغانستان ته یې د خپل سفر پر مهال گڼ مثبت بدلونونه لیدلي دي.
له ارگ څخه په خپره شوې خبرپاڼه کې ویل شوي، ډاکټر احمد موفق زیدان په افغانستان د امنیت په ټینگښت او په شوو پرمختگونو خوښي ښودلې.: «د هغو ناسمو معلوماتو برخلاف چې په رسنیو کې د افغانستان په اړه مطرح کېدل، له نږدې په دې هېواد کې د مثبتو بدلونونو په لیدلو زیات خوښ یم.»
نوموړي ویلي، اوس هم ځینې ستونزې شته او هیله لري، چې د افغانستان اسلامي امارت مشرتابه به یادې ستونزې حل کړي او افغانستان به د پرمختگ لور ته سوق کړي.
په دې لیدنه کې د ریاست الوزراء اداري مرستیال ویلي، اسلامي امارت د هېواد پرمختگ ته ژمن دی او په ټولو امکاناتو به هڅه وکړي چې افغانستان یو پرمختللی هېواد شي.: «د افغانستان اسلامي امارت په بېلابېلو برخو کې له هغې جملې د اقتصادي ودې او ځوانانو ته د کاري او تحصیلي فرصتونو برابرولو په برخو کې پرلهپسې کوښښونه کوي.»
په نړیوالو رسنیو کې لا هم د افغانستان په اړه حقایق نه ویل کېږي او لا هم په افغانستان کې حالت ترینگلی ښيي.
په هېواد کې د بشپړ امنیت له برکته اوسمهال د گڼو هېوادونو استازي، خبریالان، سیاسي شنونکي او د چارو کارپوهان افغانستان ته راځي او له دې ځایه له مثبت فکر سره بېرته ځي.
پرون د اندونیزیايي پلاوي مشر د ملي دفاع وزارت له چارسمبالي وزیر سره په لیدنه کې ویلي وو، چې د افغانستان په اړه یې په رسنیو کې یوازې تش تبلیغات اورېدلي وو.