د ترکیې ولسمشر رجب طیب اردغان تېره ورځ د می په ۲۹ مه د خپل “عدالت او پرمختګ” ګوند وکیلانو ته په وینا کې د “غزې” په اړه په ملګرو ملتونو انتقاد وکړ او پر “اسلامي نړۍ” یې غږ وکړ چې د اسرائیل وروستي خونړي برید ته غبرګون وښیي.
نوموړي وویل: “ملګري ملتونه تر دې چې د خپلو کارکوونکو ساتنه هم نشي کولی. تاسو د اقدام کولو لپاره څه ته په تمه یاست؟ په غزه کې د ملګرو ملتونو ماهیت له منځه تللی دی”.
اردغان داسې مهال په ملګرو ملتونو انتقاد کوي، چې د ملګرو ملتونو امنیت شورا د سه شنبې په ورځ د غزې په “رفح” کې د بې ځایه شویو فلسطینیانو په یو پنډغالي باندې د اسرائیلو د خونړي برید په اړه د بحث په موخه غونډه وکړه.
د اسرائیلو لخوا وروستی برید چې د رفح ښار اړوند د بې ځایه شویو کډوالو په یو پنډغالی ترسره شوی ۲۱ کسان پکې وژل شوي او ګڼ شمېر نور په کې ټپیان دي.د ترکیې ولسمشر همدا راز پر اسلامي هېوادونو باندې هم د اسرائیل برید ته د همغږي غبرګون نه ښودلو له کبله نیوکه وکړه او وې ویل چې اسلامي نړۍ باید د اسرائیلو د ظلمونو په اړه غبرګون وښیي او د دوی دا ظالمانه کړنې وغندي.
اردوغان چې د ترکیې پارلمان کې د خپل ګوند وکیلانو ته خبرې کولې و ویل: “زه اسلامي نړۍ ته څو خبرې لرم؛ تاسو د ګډې پریکړې لپاره څه ته انتظار یاست؟ اسرائیل نه یوازې غزې ته بلکې ټول انسانیت ته ګواښ دی”هغه په خپلو خبرو کې زیاته کړه: “تر هغو چې اسرائیل نړۍوال قانون رعایت نه کړي او نړۍوال قانون ته د پابندۍ احساس ونکړي، هیڅ دولت خوندي نه دی”.
اردوغان د خپلو خبرو په دوام وویل، چې اسرائیل په غزه کې “نسل وژنه” کوي، نړۍ باید د دوی د دغه وحشیت مخه ونیسي.یو شمېر رسنیو خبر ورکړی او ویلي یې دي، چې د ترکیې ولسمشر رجب طیب اردغان له دې یوه ورځ وړاندې خبرداری ورکړی و، چې هېواد به یې د اسرائیل له صدراعظم بنیامین نتنیاهو سره د حساب او کتاب لپاره “هر کار چې ممکن وي” وکړي.
په دې وروستیو کې د اسرائیلو د ظلمونو پر وړاندې نړۍوال غبرګونه زیات شوي او ان ډیری هېوادونو خپلې ټولې اړیکې له اسرائیلو سره پرې کړې دي.