د ترکي رسنيو د راپورونو پر بنسټ د ترکیې جمهوري ریاست په يوه اعلاميه کې وايي چې د دغه هېواد ولسمشر رجب طیب اردوغان د سعودي عربستان له ولیعهد محمد بن سلمان سره په ټیلیفون خبرې کړي او پر غزې د صهيونيستي اسرائیلو د بریدونو د پای ته رسولو لپاره یې د اسلامي هېوادونو له خوا د فشار راوستلو او لازمو اقداماتو په ترسره کولو ټينګار کړی دی.
د ترکیې حکومت د اعلامیې په اساس چې په ټولنیزې رسنۍ ايکس يا پخواني ټويټر خپره شوې اردوغان له محمد بن سلمان سره غزه کې وروستيو بريدونو او شهادتونو ته په اشارې وېلي چې صهيونيستي اسرائیل د مسلمانانو په تېره بيا د فلسطینانو نسل وژنه کوي.
اردوغان چې بار بار یې له حماس اسلامي غورځنګ خپل ملاتړ اعلان کړی له محمد بن سلمان سره په خبرو کې د صهيونيستي اسرائيلو پر وړاندې د اسلامي هېوادونو د ګډ اقدام اهمیت ته په اشارې وېلي؛ پر غزه د صهيونيستي اسرائیلو بریدونه او د هغوی له خوا نسل وژنه او د بشري حقونو نقض باید پای ومومي، پر وړاندې یې اقدام وشي، او هلته تلپاتې اوربند ټينګ شي.
رسنۍ د ترکیې حکومت د اعلامیې پر بنسټ وايي چې ولسمشر اردوغان د صهيونيستي اسرائيلو له خوا د فلسطین په خاوره په ځانګړې توګه غزه کې د ترسره شويو جنګي جرمونو په وړاندې پر اسرائیلو باندې د نړیوالې ټولنې د فشارونو غوښتنه کړې او د يادو فشارونو پر اهمیت یې هم خبرې کړي.
صهيونيستي اسرائيلو د تېر کال له اکټوبر مياشتې راپه دېخوا په فلسطين د هوا او ځمکې له لارې يرغل وکړ چې تر اوسه یې د خپل وحشت او بربریت په پايله کې نږدې پنځوس زره عام فلسطينيان شهيدان کړي، سلګونه زره ټپيان، ميليونونه بې ځايه، او د غزې ښارونه له خاورو سره خاورې کړي.