د افغانستان د بهرنیو چارو چارسمبالي وزیر مولوي امیرخان متقي د ازبېکستان د ترانسپورت وزیر الهام محکموف، د ازبېکستان د ولسمشر ځانگړي استازي عصمت الله ایرگشوف او مل پلاوي سره لیدلي دي.
له یاد وزارت څخه په خپره شوې خبرپاڼه کې ویل شوي، په دې ناسته کې د افغانستان او ازبېستان ترمنځ پر دوه اړخیزو سیاسي، اقتصادي، د سیمهییز اتصال ټرانزیټي پروژو، سوداگرۍ، گډې پانگونې، کلتوري او په سیمه کې د افغانستان او ازبېکستان پر ټرانزیټي رول او اهمیت خبرې اترې وشوې.
په خبرپاڼه کې د افغانستان د بهرنیو چارو وزیر له قوله ویل شوي، افغانستان وروسته له اوږدې مودې د امن او ثبات مسیر ته راگرځېدلی او دا د ازبېکستان، نورو گاونډیو او سیمې لپاره یو ښه فرصت دی چې له موقع استفاده وکړي او د اسلامي امارت د اقتصاد محوره سیمهییز اتصال پالیسي چې نه یوازې افغانستان بلکې ټولو گاونډیو او سیمې لپاره به د اقتصادي او امنیتي ثبات زېري ولري ملاتړ وکړي او د سترو اقتصادي پروژو تطبیق لپاره موجوده هڅې نورې هم چټکې کړي.
په دې لیدنه کې د ازبېکستان د ترانسپورت وزیر الهام محکموف ویلي، دا ځل له یو قوي تخنیکي ټیم سره چې د خصوصي سکتور سربېره د اوسپنې پټلۍ، جیولوجي او معدن تکړه انجنیران یې ملتیا کوي کابل ته راغلي یو او غواړو افغانانو ته ښه زېري ولرو. :«موږ د اسلامي امارت له هغې پالیسۍ ملاتړ کوو چې غواړي افغانستان د سیمې پر ټرانزیټي مرکز بدل شي. د افغان – ټرانس پروژې عملي پيل او امکان سنجۍ لپاره یې د انجنیرانو یو ټیم له ځان سره راوستی او په همدې اوونۍ کی یې په تعقیب بل پلاوی سره له تجهیزاتو افغانستان ته راځي چې د افغانستان د اوسپنې پټلۍ او نورو اړونده ادارو سره به عملا خپل کار پېل کړي.»
د نوموړي په خبره، د دې ترڅنگ مو یو بل ټیم د جیولوجي او معدن برخه کې ملتیا کوي او دوی به د افغانستان معادنو او پټرولیم وزارت چارواکو سره لیدنې ولري چې د نفتو، گازو اکتشاف او استخراج او همدا راز نورې هغه برخې چې اسلامي امارت اړونده اداراې یې را په گوته کړي؛ موږ عملي کار ته چمتو یو.:«د افغانستان او ازبېکستان ترمنځ گمرکي او سرحدي خدمات ۲۴ ساعته کولو ته چمتو یو او بل دا چې د دواړو هېوادونو ترمنځ ټرانسپورټي او ټرانزیټي خدمات نور هم وده وکړي، ټرانسپورټي او ټرانزیټي تعرفې را ټیټې کړو.»
د افغانستان د بهرنیو چارو وزیر ویلي، افغان سوداگرو ته د ازبېکستان د وېزو اسانتیا یو ښه پرمختگ دی، خو دغه لړۍ دې روغتیايي، ښوونیزو برخو او عامو افغانانو ته د سیاحت لپاره هم وغځېږي.
د ازبېکستان د ولسمشر ځانگړي استازي عصمت الله ایرگشوف ویلي، له افغانستان نه د څه باندې یو مېلیون ټن ډبرو سکرو اخیستلو لپاره یې نږدې راتلونکي کې تخنیکي ټیم کابل ته راتلونکی دی او په مزار شریف کې د امام البخاري مدرسې ساختماني چارو پېلېدو لپاره به هم انجنیران ډېر ژر افغانستان ته راشي.