له غزې څخه الجزیرې ټلویزیون راپور ورکړی چې بېګا شپه د صهيونيستي رژيم د لومړي وزير دفتر رسماً د اوربند تړون د ماتېدو اعلان کړی او له بېګا شپې راهیسې یې، تر دې دمه په بېلابېلو سيمو درنه بمباري او بريدونه کړي، چې په پايله کې یې د دې خبر د نشر تر مهاله شاوخوا ۲۳۰ عام فلسطيني وګړي شهيدان شوي، سلګونه نور ټپيان دي او دا شمېره په شدت د لوړېدو په حال کې ده.
د سرچينو په وينا په صهيونيستي رژيم سربېره امريکا هم د اوربند تړون د ماتېدو اعلان کړی او د سپينې ماڼۍ وياند ويلي چې په غزه د اسرائيلي رژيم بريد له دوی سره په همغږۍ شوی دی.
هاخوا بيا حماس غورځنګ په ټينګار سره د نړۍ له اسلامي هېوادونو د مرستې غوښتنه کړې او دغه شان یې د ملګرو ملتونو په امنيت شورا غږ کړی چې اسرائيل د اوربند تړون د ماتېدو له امله مجرم وپېژني او سمدستي یې پر وړاندې اقدام وکړي.