يديعوت احرونوت اسرائيلي ورځپاڼې د خپلو استخباراتي سرچينو له قوله راپور ورکړی، چې اسرائیل پر یوه وخت پر غزې، لبنان او ایران د پراخو بریدونو پلان جوړ کړی دی.
سرچينې ويلي، په دې پلان کې پر ايران توغنديز، پر لبنان هوايي او پر غزې بیا ځمکني پراخ بريدونه شامل دي.
ورځپاڼې د يادو بريدونو د وخت او نورو جزئياتو په اړه څه نه دي ويلي.
دا په داسې حال کې ده، چې امریکا او ملګري ملتونه هڅه کوي، د غزې لپاره یو نړیوال ځواک جوړ کړي، خو اسرائیلو خبرداری ورکړی چې تر هغه به هيڅ اقدام ته اجازه ورنه کړي، چې د ټولو وژل شویو اسرائیلیانو جسدونه نه وي ورسپارل شوي.
له بل لوري حماس غورځنګ امريکا ته خبرداری ورکړی، چې د غزې اوربند د اسرائيلي رژيم د پرلپسې نقض له امله پای ته رسېدلی دی.