د اسرائیلو لومړي وزیر دفتر ویلي، چې راتلونکې اونۍ به یو اسرائیلي پلاوی د قطر پلازمینې “دوحې” ته لاړ شي، څو غزه کې له حماس سره د جګړې د بندولو او د یرغمل شویو د خلاصون په اړه خبرې اترې وکړي.
دا خبره تېره ورځ په دوحه کې د اسختباراتي ادارې “موساد” مشر “ډیویډ برنیا” او د منځګړي اړخ ترمنځ د یوې غونډې وروسته چې د اوربند وړاندیز او د یرغمل شویو د خلاصون په اړه خبرې اترې په کې شوې وې، له رسنیو سره شریکه شوه.
بلخوا د لومړي وزیر بنیامین نتانیاهو دفتر ویلي، چې د دواړو خواوو ترمنځ لا هم اختلافات او واټن شته.
د مسوولینو په وینا د دې نوې هڅې موخه د نږدې نهه میاشتنۍ جګړې پای ته رسول دي.
رسنۍ داسې مهال قطر ته د اسرائیلي پلاوي خبر ورکوي، چې له دې وړاندې هم امریکا، مصر او قطر هېوادونو د اوربند د رامنځ ته کېدو په موخه بار بار هلې ځلې کړي، خو تر اوسه یې کومه مثبته پایله نه ده ورکړې.
د غزې روغتیا مسوولین وایي، غزه کې د اسرائیلي اشغالګرو د روانو بریدونو له امله تر دې دمه ۳۸ زرو څخه ډېر بې دفاع ولسي وګړي شهیدان شوي او نږدې ۹۰ زره نور ټپیان شوي دي؛ چې ډیره برخه یې ښځې او ماشومان دي.