د ترکیې د بهرنیو چارو وزارت یوه لوړ پوړي چارواکي اسوشیټېډ پرېس خبري آژانس ته تایید کړې، چې په پلازمېنه انقره کې د افغانستان سفارت، د پرځېدلي جمهوري حکومت د ډیپلوماتانو د دندو له پای ته رسېدو سره، اوس هم پرانیستی، چارې یې نوي سرپرست حکومت ته سپارل شوې دي.
یاد چارواکي د نوم نه ښودلو په شرط اسوشیټېډ پرېس ته ویلي، چې د افغانانو د ستونزو د کمولو لپاره دوی د افغانستان پر وړاندې د دغه هېواد له سرپرست حکومت سره د تعامل او ډیالوګ پالیسي مخ ته وړي.
د سرچینې په خبره، په دې سره د افغانستان اوسنی سرپرست حکومت اوسمهال په بهر کې له ۴۰ ډېرې فعالې افغان ډيپلوماتيکې استازولۍ او سفارتونه په واک کې لري او هڅه دا ده چې دا لړۍ نوره هم پراخه شي.