د اطلاعاتو او کلتور وزارت وايي، د یاد وزارت د هنر او فرهنگ مرستیال د کابل ښار د تاریخي ابداتو، عامه ساحو او چاپېریال ساتنې د څارنې او ساتنې کمېټې گډه ناسته کړې او د کابل د زوړ ښار د ودانیو د تاریخي سبک په اروزنه یې خبرې کړې دي.
د اطلاعاتو او کلتور وزارت څخه په خپره شوې خبرپاڼه کې ویل شوي، په دې ناسته کې د هنر او فرهنگ معین مولوي عتیق الله عزیزي، د کابل ښاروالۍ کلتوري رئیس، د اغاخان فرهنگي خدماتو موسسې، ښار جوړونې وزارت، د چاپېریال ساتنې ادارې او د تاریخي ابداتو د ساتنې ریاست استازو برخه لرله. :«ناسته کې د کابل ښار تېمور شاهي بڼ ته نږدې د لومړۍ حوزې تعمیر چې یو له تاریخي ابدو څخه ده، د ساتنې او استحکام په اړه، همدارنگه د کابل ښار لوړپوړېزو ودانيو په اړه چې د تاریخي ابدو ننداره د خطر سره مخ کوي، هر اړخیز بحث وشو.»
په خبرپاڼه کې ویل شوي، د هنر او فرهنگ معین یادې کمېټې ته سپارښتنه کړې، چې د کابل ښار په جوړه شوې عمومي فرهنگي نقشه د امکان په صورت کې له سره غور وکړي او د قوانینو په رڼا کې یاده کمېټه لومړیتونه په گوته او راتلونکو ناستو ته یې وړاندې کړي.: « د کابل زاړه ښار د معماریو او لرغونو سیمو ساتنه د هېواد د تاریخ، هویت او د اسلافو د ځلانده هنر او کمالاتو امانت دی، چې په گډه یې باید وساتو.»