په بهر کې مېشتې د افغانستان د سرپرست حکومت مخالفې ډلې ټپلې له اوږدې مودې راهیسې په دې موخه د بهرنیانو دروازې ورټکوي، چې افغانستان ته بیا جګړې راوړي، بیا د افغانانو وینې وبهوي، بیا افغانستان په کنډواله بدل کړي، بیا د قومونو ترمنځ دښمنۍ راپورته کړي، بیا پاټک سالارۍ او ټوپک سالارۍ مروجې کړي، بیا بهرنیو او ګاونډیو هېوادونو ته په افغانستان کې د لاس وهنې لارې پرانیزي او په ټوله کې افغانستان بیا د پردیو او نیابتي ډلو د جګړو ډګر وګرځوي، د خلکو اولادونه پکې تباه او خپل ځانونه او اولادونه پکې چاغ کړي، دا د دوی د ټولو منډو، ترړو او سرګردانیو اصلي موخه ده.
دغه ډلې ټپلې او د دوی سرلاري هغوی دي چې یا خو څلور لسیزې د افغان غمیزې اصلي لوبغاړي وو، یا زامن او یا یې هم د کورنۍ غړي دي. هماغه کسان او د هماغو ډلو ټپلو غړي دي، چې افغانستان یې یو ځل د کورنۍ جګړې په خونړي اور کې وسوځاوه او دا ویاړلی هېواد یې د تجزیې او ټوټه کېدو پر پوله درولی و. دا هماغه خلک دي چې شل کاله د افغانستان په هر کلي او هر ګوټ کې له امریکايي او ناټو ځواکونو سره د افغانانو په وینو تویولو پسې سرګردانه وو، هماغه کسان دي چې په ناسمو کوردیناتو به یې په امریکايي الوتکو د واده پر مراسمو، جنازو او یا هم نورو غونډو بمبارد کاوه.
دوې لسیزې یې د افغانانو په وینو تجارت وکړ، ځانونو ته یې ښه ژوند پکې جوړ کړ، د افغانانو د وینو او هډوکو په بدل کې په ترلاسه شویو پیسو یې پردي بانکونه اسوده وو، له همدې لارې په ترلاسه شویو پیسو یې په بهر کې دنګې ودانۍ جوړې کړې. له لسیزو دغه ډول تجارت وروسته، له څو کلونو راهیسې پر دوی دغه تور تجارت درېدلی، خو دوی کرار نه دي ناست، دوی لا هم لالهانده دي، دوی لا هم د هماغه دوران د بیا راوستلو په هڅه او لټه کې دي. دوی غواړي بیا د خلکو په سترګو کې خاورې واچوي، دوی غواړي بیا خلک په یوه او بل نوم، په یوه بل شعار او په یوه او بله بهانه تېر باسي او یو ځل بیا یې د هماغه وینو او بدمرغیو ډنډ ته ورټېل وهي.
دوی همدا اوس په بهر کې له ګڼو جنایتکاره ډلو، د وسلو جوړولو له فابریکو، قاچاقبرو، بدنامو او جنایتکاره استخباراتي ادارو سره لاس یو کړی، هره ورځ یې دروازې ورټکوي او په افغانستان کې د جګړې د اور د بلېدو په موخه ترې دروېزه کوي، دوی هڅوي چې دا اور ژر بل کړي او ژر افغانان پکې وسوځوي. دوی دا کار ځکه اوس دلته نه شي کولای، چې په افغانستان کې یو پیاوړی مرکزي نظام شته او ترڅنګ یې ټول عام ولس د دې بدمرغۍ غوښتونکي نه دي.
دوی ټول هڅه کوي چې خلک په یوه او بل نوم، په یوه او بل شعار او په یوه او بله بهانه تېر باسي او بیا دلته خلک جګړې ته وهڅوي. که خدای مه کړه، دوی په خپل دغه شوم پلان کې بریالي شي، افغانستان به یو ځل بیا د داسې بدمرغیو او وینو ډنډ ته لوېږي، چې بیا به هېڅکله ترې راپورته نه شي، افغانستان به بیا ټوټه کېږي، هرڅوک به پرې ظلم او تېری کوي، د پوښتنې څوک به یې نه وي، هر ځای به ټوپک سالاري او پاټک سالاري حاکمه وي، ظالم به د مظلوم په وینو او غوښو ځان پړسوي.
دا د ټولو افغانانو ګډ مسؤلیت دی چې د دغه بدمرغو او بدبختو تورو څېرو په غوړو او کاذبو وعدو، خبرو او ژمنو ونه غولېږي، خپل هېواد په لوی لاس د وینو ډنډ ته پورې نه وهي، بلکې دوی لا پسې ورټي او لا ترې واټن واخلي. افغانانو ته بویه چې اوس د خپل هېواد د ابادۍ، سوکالۍ او پرمختګ لپاره مټې رابډوهي او په دې لاره کې نه ستړې کېدونکې هلې ځلې وکړي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.