په دې وروستیو کې، پر ټولنیزو رسنیو له خپرو شویو ويډیويي او غږیزو کلېپونو او همدا راز راپورونو څخه ښکاري، چې په بهر کې مېشت د افغانستان د سولې، پرمختګ او سوکالۍ ضد کړۍ چې ځانونه په بېلابېلو نومونو او جهبو یادوي، له سختو خپل منځي اختلافاتو سره مخ دي. دغه افراد، ډلې او کړۍ چې د جمهوريت له را پرځېدو سره جوخت، له هېواده وتښتېدل او اوس په بهر کې مېشت دي، له تېرو دریو کلونو راهیسې یې په ټولنیزو رسنیو کې پراخ کمپاینونه پیل کړي، چې څنګه وتوانېږي په افغانستان کې شته امنیت، سوکالۍ او پرمختګونو ته خنډونه جوړ کړي او هېواد بیا د جګړې پر لور بوځي.
که څه هم دوی په ښکاره توګه ځانونه بېلابېلې جبهې یادوي، خو د افغانانو په منځ کې بیا د سیاسي سوداګرو، چپاولګرو، غاصبینو او همدا راز د بغاوتګرو په نوم شهرت لري. د دوی د تېر تیاره او ناوړه تاریخ له کبله ورڅخه د کرکې او نفرت ښکارندويي کوي. حتیٰ د دغه ډلو او کړیو د مشرانو پلرونه او د کورنۍ غړي د افغانستان د لسیزو بد مرغیو اصلي عاملین وو، چې له امله یې د عام ولس په منځ کې تل په ښه نوم نه یادېږي.
په افغانستان کې د تېرې شل کلنې غمیزې او یرغلونو پر مهال همدا شر او فساد د امریکا او د دوی د متحدیتونو د صف ملګري وو، په هېواد کې یې شل کاله په ګډه د افغانستان د خلکو، د دوی د دیني، فرهنګي او ملي ارزښتونو په خلاف سخته جګړه وکړه، د خلکو مالونه یې ولوټل، په افغانستان کې یې د پرديو ارزښتونو او فرهنګ د تطبیق او ترویج لپاره ډېرې منډې ترړې وکړې. بې ګناه خلک یې ووژل، زندانونه یې ترې ډک کړل، مالونه یې په زور ترې واخیستل او ځمکې یې ترې غصب کړې، له دې سره د دوی پر وړاندې مخالفتونه او کرکې لا ډېرې شوې، تر دې چې درې کاله وړاندې یې ټغر ور ټول کړ.
همدغه دوه تابعیت لرونکې فسادیان له وېرې امریکا، اروپا، ایران، تاجکستان، ترکیې او د نړۍ بېلابېلو هېوادونو ته وتښتېدل. درې کاله کېږي، چې د دوی په نشتون کې افغانانو د ارامۍ ساه واخیسته، خو دوی دومره نا ارامه او سرګردانه وو، چې ځمکې ځای ورته نه ورکاوه؛ په افغانستان کې یې د جګړې د اور بلولو لپاره د هر چا دروازه وټکول، له نړیوالو جنایتکارو بانډونو، کمپنیو او کړیو سره یې اړیکې پراخې کړې او همدا راز یې په ټولنیزو رسنیو کې هم د افغانانو تر منځ د بې باورۍ او جګړې ته د دوی د هڅونې لپاره پراخ کمپاینونه تطبیق کړل، مګر دا هر څه یې بې پایلې وو، نه پرې چا باور وکړ او نه یې چا ملا ور وتړل.
دغه ډلې له بدې ورځې او بده بخته کړېږي، اوس یې په خپلو منځونو کې د قوم، سمت، ډلې، تنظیم او ګوند په نوم نادودې پیل کړې. دوی که د هر قوم، سمت، هرې ژبې او یا هر مذهب دي، د افغانستان لپاره له بدمرغۍ پرته بل پلان نه لري؛ د دوی له سختو منډو او ترړو سره سره، نه چا ته قناعت ورکولی شي چې د دوی ملاتړ وکړي او نه هم څوک د دوی د ګټو لپاره جګړه کوي.
دې چارې دوی سخت منزوي کړي، هره ورځ ځورېږي او سپکېږي، تر دې چې اوس یې په خپلو منځونو کې ګرېوانونو ته لاس اچولی. دوی اوس د یو او بل له نادودو او پټو رازونو پرده پورته کوي. دا د لوبې او رسوايي پیل دی، دا لوبه لا پسې ګرمېږي او دا ځل به نه عادي افغان پکې زیانمن کېږي او نه افغانستان، بلکې دا ځل به دوی په خپلو کې سره وژني.
یادؤنه: په هندوکش غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش غږ توافق ورسره شرط نه دی.