د صنعت او سوداګرۍ وزارت مسئولینو نن (دوشنبه، د لړم ۱۹مه) د حکومت د اطلاعاتو او رسنیو په مرکز کې د یوه خبري کنفرانس پر مهال له چابهار بندر څخه د ټرانزیټي مسیر په توګه د افغانستان د ګټې اخیستنې د اهمیت په اړه له رسنیو سره معلومات شریک کړي.
د یاد وزارت د دفتر رئیس، محمد الله بختیار ویلي، چې د یاد وزارت په هڅو د ایران د چابهار بندر له لارې د ټرانزیټي او تجارتي چارو د تنظیم لپاره زیاتې اسانتیاوې برابرې شوي، چې د هېواد د صادراتو او وارداتو په پراختیا کې مهم ګام بلل کېږي.
نوموړي زیاته کړې، چې د سوداګرۍ وزارت له نظره د ایران له ټرانزیټي لارو په ځانګړي ډول د چابهار له ازادې سیمې څخه ګټه اخسیتنه ځانګړی اهمیت لري. په خبره یې دا یو ډاډمن ټرانزیټي مسیر دی، چې پر مټ یې ازادو اوبو ته د هېواد د لاسرسي زمینه برابرېږي.
د وزارت د مسئولینو د معلوماتو له مخې، د ایران له لوري د چابهار بندر له لارې د ټرانزیټي لګښتونو په کچه کې ۵۰ سلنه کموالی رامنځته شوی دی.
د حکومت د اطلاعاتو او رسنیو مرکز پر خپل ایکس د سوداګرۍ وزارت د معلوماتو پربنسټ ویلي، د ګډو ټرانسپورټي شرکتونو جوړول، د لوجیستیکي مرکزونو رامنځته کول او د میلک بندر تجهیز هغه چارې دي، چې د هېواد د اقتصادي ودې، کارموندنې او صادراتو د زیاتوالي لپاره بنسټیز اهمیت لري.