د افغان حکومت وياند مولوي ذبيح الله مجاهد د هېواد ختیځ ولايتونو کې د زلزلې له امله زيانمنو شويو خلکو ته په لومړۍ مرحله کې د مرستو رسولو لپاره د ۱۰۰ ميليونه افغانيو د ځانګړي کېدو اعلان وکړ.
ښاغلي مجاهد په همدې اړه جوړ شوي کنفرانس کې زياته کړه، چې په زلزله کې د ننګرهار او لغمان ولايت ځينې سيمې زيانمنې شوي؛ خو تر ټولو ډېر زيات د کنړ ولایت د نورګل، څوکۍ، وټه پور، چپه دره او ماڼوګۍ ولسواليو کې اوښتی.
د نوموړي په خبره له کنړ څخه تر اوسه پورې د ۸۰۰ تنو شهیدانو او ۲۵۰۰ تنو زخمیانو راپور راغلی او د ننګرهار ولایت له دره نور ولسوالۍ څخه تر اوسه پورې د ۱۲ تنو شهیدانو او ۲۵۵ تنو زخمیانو راپور لرو.
ښاغلي مجاهد ډاډ ورکړی، چې په سیمه کې د افغان حکومت ټولو ارګانونو ته سپارښتنه شوې تر څو د پېښې ځای ته ځانونه ورسوي، د شهیدانو په تدفین، د زخمیانو په تداوي او د زیانمنو په مرسته کې خپل ټول امکانات په کار واچوي.
نوموړي همدا راز له ټولو افغانانو غوښتي، چې له زیانمنو سره د خوراک، لباس او سرپناه په برخه کې د خپل وس په اندازه مرستې وکړي او خپله دیني او ملي وجیبه تر سره کړي.
یاده دې وي، چې د نورګل ولسوالۍ مزار دره او نورو سیمو کې لا هم د ژغورنې ټیمونه لګیا دي، شاید د زیانمنو په ارقامو کې زیاتوالی راشي.