د افغان حکومت د بهرنیو چارو وزارت په غزې تړانګه کې د جګړې پای ته رسولو په اړه د ملګرو ملتونو د امنیت شورا طرحې تصویب ملاتړ کړی او هغه یې په غزې تړانګه کې د نسل وژنې پای ته رسولو لپاره لومړنی پر ځای او مؤثر ګام بللی دی.
بهرنیو چارو وزارت د یوې خبرپاڼې په خپرولو سره ویلي: “په غزې تړانګه کې د دایمې اوربند لپاره رغنده خبرو ته اړتیا ده، څو د دې تړانګې وګړو ته د عادي ژوند زمینه برابره شي”.
افغان حکومت یو ځل بیا د صهیونیسي رژيم جنایتونه غندلي او د یوه ازاد او خپلواک هېواد لرلو لپاره یې د فلسطین د خلکو د تاریخي حق ملاتړ کړی.
د ملګرو ملتو امنیت شورا وړمه ورځ غزه کې د اوربند لپاره د امریکا د ولسمشر جوبایډن وړاندې کړې طرحه تصویب کړه، چې حـ.ـماس غورځنګ یې ملاتړ وکړ او د دې طرحې د پلي کولو لپاره یې د هر ډول همکارۍ ډاډ ورکړی دی.
په غزه کې شاوخوا اته میاشتې وړاندې هغه مهال جګړه پیل شوه، چې حماس په اسرائیلو یو ناڅاپي برید وکړ، په دغه برید کې شاوخوا ۱۲۰۰ اسرائیلیان ووژل شول او سلګونه نور د حماس لخوا یرغمل شول.
د حماس د برید را وروسته اسرائیلي یرغلګرو په غزې تړانګه د حماس د ځپلو لپاره بریدونه پیل کړل، چې له هماغه وخته یې تر دې مهاله شاوخوا ۳۷ زره فلسطینیان وژلي او څه باندې ۸۰ زره نور یې ټپیان کړې دي.
د دغې جګړې تر ټولو زیات قربانیان ښځې او ماشومان دي.
وروستي راپورونه ښیي چې په غزه کې یوازې ۳۳ زره ماشومانو ته مرګ ژوبله اوښتې او د دغې جګړې له امله ۸ زره ماشومان له خوارځواکۍ سره مخ دي.