ایراني رسنۍ وايي، د افغان حکومت د اقتصاد وزارت پلاوي دغه هېواد ته د خپل سفر پر مهال په چابهار بندر کې د دفتر پرانیستلو غوښتنه کړې ده.
د ایران مهر خبري اژانس لیکلي، د افغانستان د اقتصاد وزارت د نړیوالو ترانزیتي چارو رئیس محمدالله بختیار په مشرۍ چابهار بندر ته تللی او هلته یې د ایران د ولسمشر سلاکار حجت الله عبدالمالکي او د بهرنیو چارو له وزیر سره لیدلي دي.
د ایران د سوداگریزو چارو عالي شورا هم په یوې اعلامیې کې ویلي، افغانستان او ایران ترمنځ د سوداگرۍ په پراختیا ټینگار شوی دی.
روانه اوونۍ د صنعت او سوداگرۍ وزارت په مشرۍ د بېلابېلو ادارو پلاوی ایران ته تللی وو او هلته یې له گڼو ایراني چارواکو سره د افغانستان ـ ایران ترمنځ د سوداگرۍ په پراختیا خبرې کړې دي.
په چابهار کې داسې مهال اقتصادي دفتر پرانیستل کېږي، چې افغانستان اوسمهال د خپلې سوداگرۍ د پراختیا لپاره چابهار بندر کاروي.
چابهار بندر د افغانستان سربېره ایران ته هم گڼې اقتصادي گټې لري او د چارو د بشپړېدو سره به افغان سوداگرو ته گڼې اسانتیاوې رامنځته شي.