د ریاست الوزاء اقتصادي مرستیال ملا عبدالغني برادر نن د پنج شنبې ورځ د ثور په ۶مه د افغان ـ قزاق نندارتون د پیل په مراسمو کې وویل، چې دغسې نندارتونونه د هېوادونو ترمنځ د سوداګرۍ کچه لوړوي.
هغه زیاته کړه، چې اوس مهال په افغانستان کې تر بل هر وخت د سوداګرۍ او کار و بار لپاره ښه زمینه برابره ده.
نوموړي له افغان او بهرنیو سوداګرو څخه وغوښتل، چې له فُرصت څخه ګټه پورته کړي او په افغانستان کې دې سرمایه ګذاري وکړي.
بل لور ته مراسمو ته د وینا پر مهال د بهرنیو چارو وزیر مولوي امیرخان متقي وویل، چې افغانستان په ټوله نړۍ کې دا مهال ۳۸ فعالې سیاسي نماینده ګۍ لري.
ښاغلي متقي وویل: ” د افغانستان اسلامي امارت د بهرني متوازن او اقتصاد محوره سیاست په پایله کې اوس مهال په ۳۸ هېوادونو کې فعالې نماینده ګۍ لري”د بهرنیو چارو وزیر زیاته کړه، چې د امریکا لخوا په افغانستان بانکي محدودیتونه یو انتقام اخیستونکی او ظالمانه عمل دی او هیڅ ډول اخلاقي او قانوني توجیه نه لري.
د افغان ـ قزاق هېوادونو دغه دوه ورځنی نندارتون په کابل کې جوړ شوی، چې د دواړو هېوادونو شاوخوا “۸۰” شرکتونو تولیدات په کې نندارې ته اېښودل شوې دي.
د اقتصادي چارو کارپوهان داسې نړۍوال نندارتونونه د افغاني تولیداتو لپاره د بازار موندنې یو ښه فُرصت ګڼي او وایي، چې افغان سوادګر او مسولین باید له داسې فُرصتونو څخه زیاته ګټه پورته کړي.