د صنعت او سوداگرۍ وزارت وايي، د دغه وزارت په مشرۍ د افغان حکومت د بېلابېلو ادارو گډ پلاوی نن ایران ته روان شو، تر څو هلته له ایراني چارواکو په بېلابېلو موضوعاتو خبرې اترې وکړې.له یاد وزارت څخه په خپره شوې خبرپاڼه کې ویل شوي، د صنعت او سوداګرۍ وزارت په مشرۍ د افغانستان اسلامي امارت تخنیکي پلاوي د ریاست الوزراء د اقتصادي مرستیالۍ، د ترانسپورت او هوايي چلند وزارت، د بهرنیو چارو وزارت او مالیې وزارتونو د استازو په گډون ایران ته سفر کوي.د خبرپاڼې له مخې، دغه تخنیکي پلاوی به د سیستان بلوچستان د چابهار بندر له ظرفیتونو او اسانتیاوو څخه په گټې اخیستنې او د هېواد د ترانزیت او صادراتو د ډېرولو په اړه چې د ریاست الوزراء د اقتصادي مرستیال ملا عبدالغني برادر په وروستي سفر پر مهال هوکړه شوې وه، له ایراني پلاوي سره خبرې وکړې.افغانستان د خپلو گاونډیو او سیمې هېوادونو سره اوسمهال خپله سوداگري پراخه کړې ده، چې اوسمهال د افغانستان توکي د نړۍ ډېرو هېوادونو ته صادرېږي او د نړۍ له گڼو هېوادونو بېلابېل توکي افغانستان ته راځي.
افغان پلاوی ایران ته روان شو
#image_title