یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
درې ورځې وړاندې د البانیا مرکز تیرانا کې له افغانستان څخه یو شمیر وتلې ښځې راټولې شوې وې؛ د دوی ځینو په ښکاره د ا.ا پر ضد خبرې کولې، خو له خبرو یې څرګندېده چې دوی د افغانستان له وضعیت څخه ناخبره وې او له افغانستان څخه د ځینو رسنیو په دروغجنو راپورونو یې استناد کاوه.
دوی ملامتې نه وې ځکه دوی ته هغه څه ورسېدلي وو چې واقعیت نه وو او د ځینو مغرضو کړیو له خوا ورته په مغزو کې پیچکاري شوي وو.
دغو ښځو له نړیوالې ټولنې وغوښتل چې افغانستان ته د اوونۍ د څلویښتو میلیونو ډالرو لېږد بند کړي، ځکه د هغوی په وینا، دغه ډالر ا.ا ته ورکول کېږي او ا.ا ترې استفاده کوي؛ خو دوی له دې خبرې نه دي چې دغه ډالر ا.ا ته نه ورکول کېږي، بلکې دغه پیسې په کابل کې یو نړیوال بانک ته ورکول کېږي چې د هغوی له لوري ملګرو ملتونو او نورو مؤسساتو ته ورکول کېږي چې هغوی یې د خپلو کارکوونکو په معاشاتو، دفتري لګښتونو او افغانانو سره په بشري مرستو لګوي.
د اوونۍ څلویښت میلیونو ډالرو کې ا.ا مداخله نه کوي او په هیڅ ډول د دوی لاسته نه ورځي؛ د ا.ا ویاند ذبیح الله مجاهد هم موده وړاندې دغه مسئله روښانه کړې وه.
بهر کې میشتو ښځو د دغو پیسو د لیږد مخالفت او دغه کنفرانس کې له افغانستان څخه ورغلو ښځو بیا د پیسو له لېږد سره مخالفت نه وو کړی، ځکه دوی پوهېږي چې د دغو پیسو یوه ډېره برخه په افغانستان کې په بشري مرستو مصرفېږي چې هغو کې افغان ښځې هم شاملې دي.
په دوی کې هغه افغان ښځې هم شاملې دي چې د مؤسساتو له لوري په حمایه کېدونکو روغتونونو کې ولادت ورکوي او ژوند یې ژغورل کېږي او ځینې یې مالي مرستې هم ترلاسه کوي.
د څلویښتو میلیونو ډالرو په اړه په بهر کې د مېشتو افغان ښځو غبرګون ته سړی حیران شي چې دوی ولې د هغو پیسو بندېدل غواړي چې لږ تر لږه د یو څو افغان ښځو ژوند په داخل د افغانستان کې ژغوري او یا دا چې دغه پیسې یو څو افغان کورنیو ته د نفقې وسیله ګرځېدلې ده؛ خو معلومه ده چې دوی ناخبره دي او له حالاتو ناسم معلومات لري او یا ورکول شوي دي.
دوی له ا.ا سره د دښمنۍ له امله دلته په افغانستان کې له نورو عامو افغانانو سره دښمني کوي او ځپل یې غواړي؛ دوی په دې ډول په دې ناخبرۍ کې په البانیا کې د افغان ښځو پر ضد راټولې شوې وې او ویې ښوده چې د افغانستان له وضعیت څخه پوره خبرتیا نه لري.