امرالله صالح چې تازه يې د مقاومت جبهې څخه لاره جدا کړې او له يادې جبهې څخه يې ډيری مایوس او ناراضه کسان ورسره يو ځای کړي دي؛ تازه په دې هڅه کې دی چې په شمالي ولايتونو کې د بهرنيو استخباراتو په دستور د داعش پروژه پلې کړي.
په دې پروژه کې به د داعش خراسان سره په هماهنګۍ ځينې کارونه شامل وي چې لوجستيکي او نورې اړتياوې به يې د امرالله صالح لخوا برابريږي، خو فعاليتونه به د داعش له ادرسه ترسره کېږي او يا به هم دوی خپله د داعش په نوم ځينې کړنې ترسره کوي.
د هندوکش غږ د معلوماتو په اساس دا پروژه چې اصلي هدف يې په افغانستان خصوصا په شمال ولايتونو کې د ځينو استخباراتي سازمانونو په اشاره د دوی د رقيبو هيوادونو د کسانو په نښه کول او په هغه هيوادونو کې چې د افغانستان له اوسني سرپرست حکومت سره ښه روابط لري؛ د تشويشونو رامنځ ته کول او د افغانستان او شمالي ګاونډيو هيوادونو تر منځ د بې باوريو رامنځ ته کول دي، دغه راز ياده پروژه ښايي د هغو استخباراتي کړيو د هڅو يوه برخه وي چې غواړي داعش پروژه د منځنۍ آسيا هيوادونو ته هم انتقال کړي.
د هندوکش غږ د معلوماتو په اساس، امرالله صالح د دې کار لپاره د مقاومت جبهې څخه راجدا شوی يو مهم کس چې په مقاومت جبهه کې يې هم مهم مسؤوليت درلود، ټاکلی دی او خپله صالح په دې اړه تازه يو هيواد ته سفرونه هم کړي دي.
هندوکش غږ ته دقيق او مستند معلومات رسېدلي چې صالح د داعش سره د اړيکو پخوانۍ مخينه لري، څو کاله مخکې د جمهوريت پر مهال په کابل پوهنتون باندې د داعش له لوري ترسره شوي بريد کې هم امرالله صالح په مستقيم ډول دخيل و، کوم چې د ګڼ شمير بې ګناه محصلينو د وژل کېدو او ټپي کېدو سبب شو، ياد بريدګر د امرالله صالح لخوا په کابل کې په يو مصؤون ځای کې ساتل شوي وو او د نوموړي د ملګرو لخوا د بريد تر ساحې رسول شوي وو، دغه راز د بريد طراح هم تر وروستۍ لحظې د امرالله صالح سره په ارتباط کې و.
په ۲۰۲۲ کال کې د داعش لخوا په تاجکستان هيواد توغنديز بريد ترسره شو چې د هندوکش غږ لخوا د ترلاسه شوو دقيقو معلوماتو په اساس ياد بريد هم د مقاومت جبهې په مرسته ترسره شوی و او د بريد لپاره يادې جبهې داعش خراسان ته توغندي ورکړي وو.
د سرپرست حکومت د ځانګړو ځواکونو له لوري په افغانستان کې د داعش پروژه په سخت ډول ځپل شوې ده او د تحليلګرانو په باور د امرالله صالح له لوري د داعش دا نوې پروژه او د سيمې د استخباراتو په دستور مصنوعي داعشيت ښايي هيڅ کله خپلو اهدافو ته ونه رسېږي.