امريکايي رسنيو راپور ورکړی چې دغه هېواد ته تللی د عبدالرحمان وزیري په نوم د پرځېدلي جمهوريت يو نظامي د امریکا د ټکساس ایالت په هیوسټن ښار کې په ډزو وژل شوی دی.
سرچينو ويلي دا پېښه د یکشنبې په شپه شاوخوا ۹ بجې هغه مهال رامنځته شوې چې وزیري خپل موټر د یو استوګنیز کمپلکس د پوست بکسونو مخې ته درولی و، چې همدغه مهال د ده او يوه بل موټر چلوونکي ترمنځ د موټر درولو پر سر لفظي شخړه رامنځته شوې او په دغه پخواني نظامي یې ډزې کړي او وژلی یې دی.
پولیسو ویلي بریدګر له پېښې وروسته نه دی تښتېدلی، بلکې خپله یې له پولیسو سره اړیکه نیولې، وسله یې سپارلې پوليسو هم خوشې کړی او وايي چې له څېړنو وروسته به پرېکړه وکړي.
د پرځېدلي جمهوريت د دغه وژل شوي نظامي ورور ويلي چې دوی له آمريکايانو سره تر همکارۍ وروسته له افغانستان څخه د خونديتوب په موخه تښتېدلي خو په وينا یې په امريکا کې هم خوندي نه دي او وژل کېږي.