افغانستان لپاره د امریکا د متحده ایالاتو ځانګړي استازي توماس ویسټ په افغانستان کې د طالبانو په بند کې د امریکايي وګړو د دوو کلنو د تېریدو سره هممهاله ویلي چې خپلې ټولې هڅې کوي چې رایان کوربت، محمود حبیبي او جورج ګلزمن د طالبانو له بند خلاص او خپلو کورنیو ته ستانه کړي.
توماس ویسټ د شنبې د ورځې ناوخته اګست لسم ( زمري ۲۰) د ایکس په ټولنیزه شبکه کې په افغانستان کې د طالبانو په بند کې ددغو درېیو امریکايي بندیانو په اړه د یرغمل نیونې په چارو کې د امریکا د متحده ایالاتو د جمهور رئیس ځانګړي استازي روجر کارسټینز د یو ټویټ په غبرګون کې ویلي باید چې خپلې ټولې هڅې خپلو کورنیو ته د دغو بندیانو د ستنولو لپاره ترسره کړي.
هغه ویلي: ” نن ورځ زما فکر او دعاګانې رایان کوربت، محمود حبیبي او د هغوی کورنیو سره دي. مونږ غواړو او باید چې خپلو ټولو هڅو ته دوام ورکړو ترڅو هغوی او جورج ګلزمن د هغوی کورنیو ته ستانه کړو”.
د یرغمل نیونې په چارو کې د امریکا د متحده ایالاتو د جمهور رئیس ځانګړي استازي روجر کارسټینز د ایکس په ټولنیزه شبکه کې ددغو درېیو امریکايي وګړو په اړه لیکلي: ” دوه کاله د مخه ریان ګوربت او محمود حبیبي په افغانستان کې بندیان شوي دي. ریان، محمود او جورج ګلزمن د ډېرې اوږدې مودې لپاره په بند کې پاتې شوي او د هغوی کورنیو داسې کړونه ګاللي چې تصور یې نشي کیدلی. مونږ به خپلو کورنیو سره د هغوی د يو ځای کېدو لپاره خپلو هر ډول هڅو ته دوام ورکړو”.
د امریکا د متحده ایالاتو د بهرنیو چارو وزارت ویاند متیو میلر د جمعې په ورځ اګست نهم ( زمري ۱۹) ویلي و چې د شنبې په ورځ د طالبانو په بند کې د رایان کوربت او محمود حبیبي د بند د تېریدو دوه کاله پوره کېږي.
هغه واشنګټن ډي سي کې خبریالانو ته وویل: ” دا دوه کاله کېږي چې هغوی د خپلو کورنیو څخه جلا شوي دي. مونږ په افغانستان کې د محمود، راین او جورج ګلزمن امریکایانو په غیر عادلانه ډول د توقیف او هوساینې په اړه په ژور ډول اندیښمن یو او مونږ د طالبانو سره په هره ناسته کې د هغوی د توقیف مسله راپورته کړې ده”.
میلر وویل چې ددغو امریکايي بندیانو خوشې کیدل او خپلو کورنیو ته د هغوی ستنول د امریکا د متحده ایالاتو د حکومت په لومړیتوبونو کې ځای لري.
افغان حکومت تر اوسه د دغو امریکايي بندیانو په اړه د امریکايي چارواکو دغو څرګندونو ته غبرګون نه دی ښودلی. خو د افغان حکومت ویاند چې د ملګرو ملتونو په کوربتوب د افغانستان په تړاو د دوحې ۳ مه غونډه کې ددغه حکومت په استازیتوب ګډون کړی و، د تېرې میاشتې جولای په درېیمه د دوحې څخه د ستنیدلو وروسته کابل کې خبریالانو ته وویل چې د دوو امریکايي چارواکو سره یې د امریکايي بندیانو د خوشې کیدو په شرایطو خبرې کړي دي.
هغه وویل: ” د افغانستان شرایط باید ومنل شي چې په هغه شرط باندې مونږ هم اتباع لرو چې په امریکا کې بندیان دي په ګوانتانامو کې بندیان دي د هغو پر وړاندې باید مونږ خپل اتباع راخلاص کړای شو څرنګه چې امریکايي اتباع هغوی ته مهم دي مونږ ته افغانان مهم دي؛ په دې اړه مو هغوی سره بحثونه کړي دي”.
ذبیح الله مجاهد وویل چې په دې موضوع د مخه هم امریکايي چارواکو سره خبرې شوې وې او په راتلونکې کې به هم دا خبرې دوام ومومي.