امریکایي ديپلومات پاکستان کې د ترسره شويو پارلماني ټاکنو د بینظمیو په څيړلو ټینګار کړی دی.
د جنوبي اسیا لپاره د امریکا یو لوړپوړی ډيپلومات ډونالډ لو ( Donald Lu) وایي، که پاکستان په تېرو پارلماني ټاکنو کې ترسره شوې بې نظمۍ ونه څېړي، دا کار به د واشنګټن او اسلام اباد اړیکې زیانمنې کړي.
ده تېره ورځ د امریکا د استازو جرګې یوې فرعي کمېټې ته ویلي چې متحده ایالتونه د پاکستان د تېرې فبرورۍ میاشتې د ټاکنو په اړه ” جدي اندېښنې” لري او په خبره یې که اړتیا وي، ټاکنې دې له سره وشي.
نوموړي ویلي، هغه سیمو کې چې د ټاکنو پر وخت درغلي او لاسوهنه شوې، باید له سره ټاکنې وشي، په هغه صورت چې د پاکستان د ټاکنو کمېسیون یې تائید کړي.
د تېرې فبرورۍ میاشتې په اتمه نیټه پاکستان کې پارلماني ټاکنې ترسره شوې چې هیڅ یوه ګوند په کې اکثریت ونه ګاټه اوپه پایله کې دوو ګوندونو ایتلافي حکومت جوړ کړ.