لیکوال: عادل وطنمل
امریکا د خپلو ګټو د تحفظ لپاره د هرې لوبې لپاره مُهرې او دانې لري؛ د ښځو په عزت او ابرو یې د سیماثمر په مشرۍ دوکان پرانستی و او اوس یې د رینا امیري په نامه نانځکه را پاڅولې ترڅو د افغان ښځو د بېلارېتوب پروژه ډیزاین او د سیما ثمر په رول کې ظاهره شي.
دا سمه ده چې افغانان د ښځو زده کړې غواړي، دا سمه ده چې ښځو ته د کار مصون چاپیریال غواړي او نظام هم ژمن دی او پرلپسې ډول یې ویلي چې موږ ښځو ته د اسلامي او افغاني ارزښتونو په چوکاټ کې تعلیمي او کاري خوندي چاپیریال باندې کار کوو، همدا اوس سلګونه مدرسې او طبي انستیتونه د ښځینه زده کړو پرمخ پرانستي دي، هیڅ موانع او ننګونې يې پر مخ نشته، د پخوا په څېر یې کوڅه ډبي ځوانان په لارو او کوڅو کې د مزاحمت جرائت هم نه شي کولی.
هر هېواد ځانته محیطي او عقیدوي شرایط لري؛ امریکایان، اروپایان، شرقیان او غربیان نه شي کولی چې د خپلو حکومتونو سیټپ آپ دلته عوض او replace کړي.
په شلو کلونو کې یې د ډالرو او بمونو باران لاندې دا چاره ونشوه کړای چې لا یې مستقیم حضور درلود اوس به یې څه ډول وکړي چې نه حضور لري او نه یې وس رسېږي؟
د غرب پر واټونو څو بې لباسه او بې حجابه مېرمنې زموږ د افغانو باعفتو او با عزتو مېرمنو استازولي نشي کولی، زموږ ټوله ډېره حساسه ده دوی د غربي دموکراسۍ او د ښځو تر حقوقو لاندې درواغجنو تبلیغاتو تر تاثیر لاندې نه راځي، دوی د غرب د ښځو ستړی او بې عزته ژوند د رسنیو، کتابونو او اخبارونو له لارې څاري او ګوري یې، چې ښځې عسکري کوي، جګړو ته ځي، په کانونو کې کار کوي، د جبري زناګانو قرباني دي، او په رنګارنګو ناروغیو اخته دي.
نن سبا هلته ټول د فامیلي ژوند په ارمان دي، مګر دا حق ترې غربي دموکراسۍ او سیکولریزم اخیستی، نر اخلي بل نر ته یې ودوي، ښځه له ښځو سره ودونه کوي، څوک د ښځو په ځای سپي ساتي، څوک په ښځو بچي نه راوړي او خپل ملکیتونه او سرمایې د سپیانو په نومونو ثبتوي.
تاسو د ځان وژنې او رواني ناروغیو په تړاو څېړنیز راپورونه ولولئ ټکان به وخورﺉ؛ د ډلیزو جنسي بریدونو په قضیو به مو غونې زېږې شي.
چېرته چې له انسان د فامیل حق اخیستل کېږي، چېرته چې انسان ته د انساني وقار لاندې ژوند نه ورکول کېږي او چېرته چې یوه مېرمن خپل فطري ژوند ته نشي راګرځېدلای، هلته د کوم بشر بحث مطرح دی؟
له دغسې اختناق نه ډک چاپیریال له ما څخه د ښځو حقوق څه ډول غواړي؟ ښکاره ده چې دوی زموږ د ښځو لپاره داسې ژوند غواړي چې زموږ خپلې مېرمنې ورته نه دي حاضرې.
دلته هره ښځه، لور ده، مور ده، مېرمن او خور ده؛ د ښځې د لورولۍ حیثیت، د خورولۍ حیثیت، د مېرمنې په توګه د هغې مقام او د مور په توګه د دوی مقام او شان باعزته، با عظمته او له درناوي ډک شمېرل شوی.
د کوم بشر د حقونو ادرسونه چې دي، دوی دې لږ تر لږه د اټوم بمونه د بشر په ضد نه تولیدوي، دوی دې د بشر په ضد خپلې تسلیحاتي فابریکې وتړي، او دوی دې په ګرده نړۍ کې اقتصادي او خپلې نیابتي جګړې ودروي، یا دې لږ تر لږه له بشر سره ځان په شر نه اړوي.
تېره ورځ زموږ په ګاونډ کې د پاکستان پوځ او آی ایس آی څو معصوم انسانان ژوندي تر خاورو لاندې کړل، ما د ټولې نړۍ رسنۍ واړولې را واړولې او د چاپي رسنیو په سرخیو کې مې هم ددې لویې بوږونکي پېښې په تړاو متاسفانه کوم خبر تر سترګو نه شو، هسې مې د بشر حقوقو ادرسونو ته د الفت صیب دا بیتونه مخ ته راغلل:
په احسان غلاموې چې بل انسان
بیا دعوه کوې د خیر او د احسان
دا که ستا بشر دوستي وي بشر دوسته
لا به کړې چې لېوه شې یا شیطان
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.