یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د اسلامي امارت له راتګ سره سم د پاکستان پالیسي د افغانستان لپاره بدله شوې چې؛ د دې پالیسۍ د تغیر لوی لامل د امریکا دوهمه لوبه یا په سیمه کې د B پلان تطبیق دی.
امریکا چې په خپل A پلان کې ماته وخوړه اوس یې د لوبې رُخ بدل کړی او د دې لوبې لوبغاړی یې پاکستان ټاکلی دی.پاکستان بیا د شر او فساد ډلې د افغانستان د سیاست د سترنج په تختې لوبوي او غواړي چې د امریکا پروژه او B پلان تطبیق کړي.
د افغانستان د بهرنیو چارو وزیر امیرخان متقي پاکستان او امریکا دواړو ته ګواښ وکړ او ویې وویل:«په سیمه کې د امریکا او پاکستان د پوځونو نظامي تمرینات د افغانستان هوایي حریم نقض او د افغانستان د ملي حاکمیت او ځمکني بشپړتیا درناوی نه کول به ددې لامل شي چې زموږ اړیکې سره خرابې کړي او دغه ډول سرغړونې نه په تېر کې او نه په اوس کې بې ځوابه پاتې شوې او نه به بې ځوابه پاتې شي».
افغانان که هر وخت سخته کې راګیر شوي؛ لوږه، تنده نیستۍ، مهاجرتونه او ستونزې یې ګاللي مګر دا ټولې قربانۍ یې د ازادۍ د نعمت لپاره ګاللي.
افغانان هيڅکله د مریتوب او غلامۍ ژوند نه غواړي، هره سخته مني مګر د غلامۍ ژوند نه مني، مرګ ته د مریتوب په ژوند زر وارې ترجیح ورکوي.
هر وخت چې افغانان د یو نسبي نظام خاوندان شوي دي نړۍ ورته د بدنیتۍ سترګې نیولي او بیا یې په داخلي کشمکشونو کې اچولي او د افغانستان قضایاوې یې متنازع کړي دي.
اوس هم چې افغانانو استقلال ګټلی او د خپل ژوند عرابه یې د خپل نوي خپلواک نظام تر چتر لاندې برابر کړی، چاته د لوږې او بې کارۍ شکایت نه کوي، خپلې ستونزې یې د بل درګاه ته نه دي وړي؛ خپله خاوره کې سپوره ډوډۍ خوري د بل هېواد په چارو کې لاس نه وهي؛ مګر همسایه ګان ډول ډول دسیسې راپورته کوي غواړي چې دا نسبي امنیت او دا خدای راکړی نظام له ننګونو سره مخ کړي مګر د دوی دا شوم پلان به کله هم عملي نه شي.
څنګه چې انګریزانو درې لویې ماتې تجربه کړې، څنګه چې ناټو د 52 هیوادونو په چوکاټ کې شرمناکه ماته وخوړه او تر ناټو وړاندې سور کمون دړې وړې شو؛ دغه سرنوشت به د افغانستان د هر بدخواه وي.
دوی همیشه افغانستان ته په ډېره کمه سترګه کتلي او افغانستان هغه ژور ګړنګ دی چې ډېرې مغرورې ککرۍ په کې خاورې شوي دي.
زمونږ د وطن تالې، ناوونه، غرونه او ګړنګونه یو هیبت او عظمت لري؛ له سکندر واخله تر چنګیزخان پورې هر زورور په کې خپل آسونه زغلولي مګر له افغانستان څخه یې روغه سټه نه ده وړې.
درې لویې امپراطورۍ په کې ماتې شوي چې امریکا یې څلورمه وه چې زموږ په ژوند کې د افغانانو د بې دریغه قربانیو او د خدای جل جلاله د خاصې لورېنې په برکت ماته شوه.
د مغولو امپراطورۍ، د ایرانیانو صفوي امپراطورۍ، د انګلیس امپراطورۍ او د امریکې د امپراطورۍ جنازې زموږ له خړې او مظلومې خاورې ووتلې.
بیا هم که د هر زورور زړه وي چې زموږ په وطن یرغل راوړي له راتګ وړاندې دې د بیرته وتلو لارې او ګودرې وګوري.
سمه ده چې موږ به ټکنالوژۍ او معاصرې وسلې ونه لرو مګر؛ موږ د همدې زورورو شاجورونه بېرته د خدای جل جلاله په تکیه او توکل په همدوی تشوو.
خوشحال بابا هر زورور ته همدا خبره کوي چې:
ټیټ مې مه بوله غورځنګ راباندې مه کړه!
زه په دې افتادګۍ کې لوی ګړنګ یم.