د ریاستالوزراء اقتصادي مرستیال ملا عبدالغني برادر په کابل کې د اندونیزیا د هلال احمر، د جوماتونو شورا رئیس او د اندونیزیا د ولسمشر پخواني مرستیال محمد یوسف کالا سره لیدلي او په دوه اړخیزو همکاریو یې خبرې کړې دي.
له اقتصادي مرستیال دفتر څخه په خپره شوې خبرپاڼه کې ویل شوي، د دغه لیدنې پر مهال د دواړو لورو ترمنځ پر سیاسي، اقتصادي، سوداگریزو او د دواړو هېوادونو د ولسونو تر منځ د دوه اړخیزو اړیکو پر پراختیا خبرې وشوې.
په خبرپاڼه کې د ښاغلي برادر له قوله ویل شوي، افغانستان او اندونیزیا د تاریخ په اوږدو کې ښې اړیکې لرلې دي او اوسمهال د دغو اړیکو د پراختیا لپاره ښه زمینه برابره شوې، چې پکار ده دواړه هېوادونه یې د پياوړتیا لپاره په گډه کار وکړي.:«په افغانستان کې د سرتاسري امنیت په راتلو سره د انرژۍ، کانونو، اوبو بندونو، زېربنا، صنعت او نورو برخو کې د پانگونې ښه فرصتونه رامنځته شوي، چې اندونیزیايي پانگهوال کولی شي په یادو برخو کې پانگونه وکړي. اسلامي امارت پانگهوالو ته لازمې اسانتیاوې رامنځته کړې دي او د هر ډول همکارۍ ډاډ ورکوي.»
د اندونیزیا د هلال احمر او د جوماتونو شورا رئیس او د دغه هېواد د پخواني ولسمشر مرستیال محمد یوسف کالا په افغانستان کې د رامنځته شوو پرمختگونو ستاینه کړې، چې دوی به د اندونیزیا حکومت، خلکو او نړۍ ته د افغانستان واقعي وضعیت په ډاگه کړي.:«اندونیزیا په مختلفو برخو کې له افغانستان سره د خپلو اړیکو پراخول غواړي او اندونیزیايي پانگهوال لېواله دي، چې د افغانستان په کانونو کې پانگونه وکړي.»
محمد یوسف کالا زیاته کړې، په نږدې راتلونکي کې به د افغانستان په کانونو کې د پانگونې په موخه اندونیزیايي اقتصادي پلاوی کابل ته راشي او دلته به په مختلفو برخو کې د گډو اقتصادي همکاریو په اړه له افغان لوري سره بحثونه ولري.
د اندونیزیا یو پلاوی کابل ته راغلی او په کابل کې یې له گڼو دولتي چارواکو سره لیدلي او د افغانستان له اوسني وضعیت یې خوښي ښودلې ده.