د ملي موزیم رئیس صبغت الله عابد وايي، اوسمهال په ملي موزیم کې څه باندې ۶۰ زره لرغوني اثار موجود دي.
نوموړي د کلتوري میراثونو د ساتنې له نړیوالې ورځې په مناسبت ویلي، گڼ شمېر کسانو او هېوادونو هڅې وکړې چې د افغانستان لرغوني اثار له منځه یوسي.
دی وايي، د افغانستان ملي موزیم پر دې بریالی شوی چې د هېواد له بېلابېلو ولایتونو سلگونه لرغوني او کلتوري اثار کشف او د هېواد ملي موزیم ته وسپاري.
د عابد په خبره، د افغانستان په ملي موزیم کې د هغو معلوماتو او شمېرو پر بنسټ چې له موږ سره موجود دي څه باندې ۶۰ زره قلمه اثار موجود دي.:«هڅه کوو چې افغاني کلتور ژوندی وساتو او د لرغونو اثارو سمه ساتنه وکړو، زموږ او تاسو دښمنانو ډېره هڅه وکړه چې زموږ کلتور او تاریخ تر خاورو لاندې کړي او له منځه یې یوسي، په دې برخه کې د مبارزې لپاره باید ټول هڅه وکړو چې د هېواد کلتور له منځه ولاړ نهشي.»
د اطلاعاتو او کلتور وزارت د معلوماتو پر بنسټ، د افغانستان اسلامي امارت مشرتابه د لرغونو او کلتوري اثار د قاچاق او پلور د مخنیوي امر کړی دی او له سرغړوونکو سره به قانوني چلند کېږي.
په افغانستان کې پرلهپسې څلوېښت کلنې جگړې د هېواد زرگونه تاریخي اثار ورک کړل، ځینې یې په بهرنیانو وپلورل شول او ځینې له منځه یوړل شول.
د افغانستان زرگونه لرغوني اثار لا هم د نړۍ د گڼو هېوادونو په ملي موزیمونو کې شته.