د افغانستان د اوسپنې پټلۍ اداره وايي، په تېرو دوو اوونیو کې د اوسپنې پټلۍ له لارې (۱۵۱۴۹۵) مټریک ټنه توکي لېږدول شوي دي.
له یادې ادارې څخه په خپره شوې خبرپاڼه کې ویل شوي، د حیرتان اوسپنې پټلۍ له لارې (۱۱۳۲۷۱) ټنه، د آقینې اوسپنې پټلۍ له لارې (۱۹۵۲۳) ټنه او د تورغونډۍ اوسپنې پټلۍ له لارې (۱۸۷۰۱) ټنه انتقالات چې ټولټال (۱۵۱۴۹۵) ټنه نفتي، غیر نفتي او نور مواد دي، هېواد ته وارد او صادر شوي دي.
د خبرپاڼې له مخې، د افغانستان د اوسپنې پټلۍ اداره هڅه کوي، ترڅو د لا زیاتو انتقالاتو لپاره مناسب شرایط برابر او سوداگرو ته اړینې اسانتیاوې چمتو کړي.
افغانستان اوسمهال د اوسپنې پټلۍ له لارې له ایران او ترکمنستان سره نښلول شوی او له دې لارو د افغانستان توکي د نړۍ گڼو بازارونو ته رسول کېږي.