څو ورځې وړاندې د حزب وحدت ګوند مشر محمد محقق ايران ته د مهاجرينو د ستونزو د حل تر پوښښ لاندې سفر درلود، دا سفر چې په ظاهر کې د ملي مقاومت شوری له ادرسه او په ايران کې د مهاجرینو د مشکلاتو د حل په نوم اعلان شوی و؛ څو پټ اهداف او ابعاد يې لرل چې هندوکش غږ د خپلو کره منابعو څخه د لاسته راغلو دقيقو معلوماتو په اساس ورته لنډه کتنه کوي.
لومړی دا چې د محقق له لوري دغه سفر ايران ته د مقاومت شوری د رهبري غړي او د دعوت ګوند د مشر سياف د هغه سفر په وړاندې يو رقابتي سفر او يو ډول غبرګون و، چې څو مياشتې مخکې ترسره شوی و، په ياد سفر کې سياف د ايراني لوري سره د افغانستان د سرپرست حکومت سره د خبرو او مذاکراتو د زمينه سازۍ او منځګړيتوب غوښتنه کړې وه او ايراني لوري هم ورته شين چراغ ورکړی و، چې د ياد نظر او غوښتنې سره په مقاومت شوری کې له اول سره د محقق او يونس قانوني حلقې خپل مخالفت پیل او د دې لپاره يې د شوری د غړو تر منځ پټ کمپاينونه پيل کړل، په شوری کې د محقق او قانوني له لوري داسې پلان ونيول شو تر څو په يو مناسبه طريقه د شوری نور غړي ايران ته د يو هيئت د ليږلو په اړه قانع کړي تر دې چې د محقق له لوري د ترتيب شوي پلان په اساس په شوری کې د يونس قانوني څخه په استفادې ايران او پاکستان ته د مهاجرينو د ستونزو په اړه د يادو هيوادونو سره د خبرو لپاره د سفر موضوع رامنځ ته کړه، له اوږدو مشورو وروسته پلان ونيول شو تر څو دواړو هيوادونو ته د مقاومت شوری له ادرسه هيئتونه سفر ترسره کړي، چې همداسې وشول او له مخکې د ترتيب شوي پلان مطابق محقق ظاهراً د شوری په استازيتوب ايران ته سفر ترسره کړ خو په اصل کې دا سفر د سياف د مخکې ترسره شوي سفر او پلانونو د بې اثره کولو او کم رنګه کولو لپاره د يونس قانوني سره يوه بريالۍ هماهنګ شوې هڅه وه.
دوهم دا چې محقق د ايران سره په بلوچستان کې د بلوچ قوم د نفوس او شمير د کمولو، په بلوچستان کې د بلوچ قوم د اقليت کولو او پر ځای يې د هزاره قوم د ميشت کولو يوه ګډه پروژه لري چې د دې سفر يوه مهمه موخه هم همدا وه، د هندوکش غږ د کره سرچينو د معلوماتو په اساس د دې پروژې عملي تطبيق د ميکانيزم په اړه د ايراني لوري او محقق تر منځ اوږده بحثونه او پټ توافقات ترسره شوي دي.
دا چې محقق د پاکستان د استخباراتي سازمان آی ایس آی سره د جاسوسۍ يوه اوږده مخينه لري او پاکستان ته د تيرې مارچ مياشتې او هلته د آی ایس آی سره په ليدنو او توافقاتو کې يوه مهمه برخه يې په ايران او سيمه کې د پاکستاني استخباراتو لپاره کار او د هغوی د نظر وړ معلوماتو راټولول وو، نو د ايران سره د دې ګډې پروژې او فرصت څخه اوس محقق د ايران لپاره په بلوچ مېشتو سيمو کې د هزاره ګانو د ځای پر ځای کولو سربيره غواړي له دې لارې په ايران او په ځانګړي ډول د بلوچستان په سرحدي ولايت او سيمو کې د پاکستان لپاره هم خپل خلک او جاسوسان ځای پر ځای کړي.
خو دا چې محقق به په يو وخت کې د ايران، پاکستان او د مقاومت شوری سره د داسې يوې پيچلې لوبې په کاميابه ډول ترسره کولو بريالی شي او که نه؟ د افغانستان د فراري سياسيونو، ملوثې سياسي او جاسوسي سابقې ته په کتلو بعيده بريښي، مګر دا چې د سيمې او نړۍ استخباراتي سازمانونه د خپلو لويو اهدافو د تر لاسه کولو لپاره د ابزار په توګه استفاده وکړي.