وروسته له هغه چې د مقاومت شوری د رهبرۍ غړی محمد محقق د يوه هيئت په رأس کې ايران ته سفر وکړ، د مقاومت په نوم د قومي او فاميلي جبهې مشر احمد مسعود هم په يوه بېړني؛ خو رقابتي سفر ايران ته ولاړ او هلته يې د ايراني چارواکو، د سپاه پاسداران د مسؤولينو او په ايران کې د مقاومت په نوم جبهې له غړو او ځينو ځايي مسؤولينو سره وکتل.
هندوکش غږ د خپلو کره او باوري سرچينو څخه د ياد سفر او ليدنو جزئيات ترلاسه کړي چې ښيي، احمد مسعود ايران ته د محقق له سفر څخه زيات اندېښمن و، نو ځکه يې په بېړني ډول د محقق له بيرته ګرځېدو سره سم ايران ته سفر وکړ.
د هندوکش غږ لخوا د تر لاسه شویو معلوماتو په اساس احمد مسعود ايران ته د محقق د سفر او د ايراني چارواکو سره د نوموړي د ليدنو په اړه ايرانيانو ته سخت اعتراضات وړاندې کړل. نوموړي له ايراني چارواکو او د سپاه له مسؤولينو سره په لیدنو کې، د هغه لسګونه زره امريکايي ډالرو د نغدي مرستې په اړه هم سخت غبرګون ښودلی او اعتراض يې وړاندې کړی، کوم چې په تېر سفر کې د ايرانيانو لخوا محقق ته ورکړل شوي وو.
سرچينه زياتوي چې ايراني چارواکو که څه هم احمد مسعود ته ډاډ ورکړ چې له محقق سره يې ليدنې ډيرې عادي او تشريفاتي وې او هيڅ ډول کوم خاص توافق ورسره نه دی شوی، خو احمد مسعود بيا هم په تکراري ډول ايراني مسؤولينو ته د موضوع په اړه خپل حساسيت څرګند کړ.
سرچينه زياتوي چې احمد مسعود د دې سفر په ترڅ کې د ايران مشهد ښار ته هم تللی او هلته يې د اسماعيل خان، حضرت علي او ځينو نورو مسؤولو کسانو سره د يادې موضوع او تازه جرياناتو په اړه خصوصي ناستې کړې دي.
د احمد مسعود لخوا دا سفر په داسې حال کې ترسره کېږي چې د تيرې اپريل مياشتې په وروستيو کې د مقاومت په نوم شوری له اوږدو بحثونو وروسته پرېکړه وکړه چې د محقق په مشرۍ ايران ته يو هيئت د مهاجرينو د ستونزو په پوښښ کې ايران ته واستوي، که څه هم دا سفر په مقاومت شوری کې هم له داخلي په ځانګړي ډول د سياف له مخالفت سره مخ و. خو د مقاومت په نوم جبهه چې اوس مهال په مقاومت شوری کې سمبوليک عضويت لري په قصدي ډول په ياد سفر او د هيئت په ترکيب کې له پامه غورځول شوی و او په ايران کې هم د مقاومت جبهې هيڅ لوړ پوری مسؤول لکه اسماعيل خان او حضرت علي چې دوی هم د مقاومت شوری غړيتوب لري؛ په جريان کې اچول شوي نه وو، په دې اړه د احمد مسعود د ذکر شوي اعتراضي او رقابتي سفر سره سره د مقاومت شوری غړي او احمد مسعود ته نږدې کس حضرت علي په خصوصي ډول د مقاومت شوری په ځانګړي ډول يونس قانوني ته په سختو ټکو کې خپل اعتراض وړاندې کړی او دا يې په ښکاره ډول د خپلو ځانونو او مقاومت جبهې سپکاوی بللی.
د يادونې وړ ده چې په دې وروستيو کې د مقاومت جبهې او مقاومت شوری چې زياتره يې پخواني ناکام سياستوال دي؛ تر منځ اختلافات خپل اوج ته رسېدلي چې په وروستي پرمختګ کې مقاومت جبهې او د صلاح الدين په مشرۍ جمعيت ګوند د يادو سياستوالو له ملي مجمع سره هم پرېکون وکړ، ورپسې د محقق لخوا په ملي مجمع کې د مقاومت جبهې او احمد مسعود يو نږدې او وفادار کس عنايت الله طوفان هم د ځينو مخالفتونو په اساس له مجمع څخه اخراج شو.