انډيپنډنت فارسي رسنۍ راپور ورکړی چې په بهر کې مېشت د ایران د بشري حقونو سازمان د شنبې په ورځ په يوه راپور کې ويلي، چې د روان میلادي کال د اپرېل په میاشت کې لږ تر لږه ۱۱۰ کسان د ایران په بېلابېلو زندانونو کې اعدام شوي دي.
سرچينې د ياد سازمان د راپور له مخې ليکلي، چې د ۲۰۲۵ کال په لومړیو څلورو میاشتو کې د اعدام شویو کسانو شمېر د تېر میلادي کال د همدې مودې په پرتله ۷۵ سلنه زیات شوی دی.
د معلوماتو له مخې، د ۲۰۲۵ کال له پیل راهیسې تر اپرېل میاشتې پورې لږ تر لږه ۳۴۳ تنه، چې ۱۱ ښځې هم پکې دي، په ایران کې اعدام شوي؛ په داسې حال کې چې د ۲۰۲۴ کال د همدې مودې پر مهال ۱۹۵ تنه اعدام شوي و.
سرچينه زياتوي، چې د تېرې میاشتې په اعدام شویو کې درې ښځې، څلور افغان اتباع، ۳۵ تنه د بلوڅ قوم غړي، شپږ تنه کُردان او یو تن عرب شامل دي.
د اعدام شويو کسانو له ډلې نه نهه تنه د امنیتي، سیاسي او مذهبي تورونو او یو تن هم د جاسوسۍ په تور اعدام شوی دی.