د ایران منتخب ولسمشر مسعود پزشکیان د خپل ټاکنیز کمپاین پر مهال ويلي وو، که چیرته زه د ایران ولسمشر شوم او ټاکنې مې وګټلې، افغان کډوال به له هیواده بهر کړم؛ نوموړي له ورایه د افغان کډوالو لپاره خپل دريځ روښانه کړی و.
اوس پوښتنه دا مطرح کېږي چې ایا د کډوالۍ مسله له افغان کډوالو سره پر ضدیت، دېوالونو جوړولو او غیر انساني اقداماتو حل کېدلای شي؟ په همدې تړاو د ایران د بهرنیو چارو د وزیر مرستیال سید رسول موسوي هم وایي، د کډوالۍ مسله له افغان کډوالو سره پر ضدیت، په پولو کې د دېوالونو په جوړولو او غیرې انساني اقداماتو نه شي حل کېدلای.
پورته ذکر شوې څرګندونې موسوي په داسې حال کې کړي چې، په دا وروستیو ورځو کې له افغان کډوالو سره د ایران له لوري د ناوړه چلند ګڼ راپورونه خپاره شول، موسوي پر خپله ایکسپاڼه (پخواني ټویټر) کې همدا راز لیکلي، ترڅو چې بېوزلي وي، مهاجرت او کډوالي به وي، ځکه چې کډوالي یوه نړۍواله ستونزه ده.
موسوي ایران ته په خطاب کې ویلي، لا تر اوسه حکومتونه په دې نه دي توانیدلي، چې د دېوالونو په جوړولو، د کډوالۍ پرضد پر سختو/جدي پالیسیو او له کډوالو سره د غیرې انساني سلوک په وسیله دا ستونزه حل کړي.
ایران تازه له افغانستان سره پر پوله د ۳۰۰ کیلومتره، دېوال جوړولو چارې پیل کړي، ویل کېږي چې دا دېوال له افغانستان سره د پولې په اوږدو کې ۳۰۰ کیلومتره اوږدوالی او ۴ متره لوړوالی لري؛ د دغه دېوال د جوړولو هدف د دوی په خبره د امنیت د لا ټینګښت، د مخدره موادو د قاچاق او د ناقانونه کډوالو د راتګ مخنیوی دی.
ایران چې ځان د افغانانو نږدې دوست او ملګری ګڼي، په دا وروستیو کې یې په لسګونه افغان کډوال په دار ځړولي دي؛ دوستي، ملګري، ګاونډيتوب او خواخوږي به همدې ته وایي چې د دوی له لوري پر افغان کډوالو ترسره کېږي؟د معلوماتو پر بنسټ ایران کې اوس مهال (۷۰۰۰) افغانان په بېلابیلو نومونو زندان ته اچول شوي، دا لا څرګنده نه ده چې څومره کسان د دې له جملې په اعدام محکوم شوي دي؟ د رسنیو د معلوماتو پر بنسټ سږ کال په روان (۱۴۰۳) کال په څلورو میاشتو کې (۱۴) افغانان اعدام شوي.
هغه چې ځان د بشر د حقونو مدافعین ګڼي چېرته دي؟ ولې د ایران پر وړاندې خپل غږ نه پورته کوي، چې د بشر حقونه تلف شوي، بشریت ته په سپکه کتل کېږي؟
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.