یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
په افغانستان کې د حزب التحریر پلویانو یو ځل بیا د خلافت د اعادې خبره راپورته کړې ده؛ دوی چې په عدم تشدد یا له جهاد او جګړې پرته د ازادۍ په اخیستلو او اسلامي حکومتونو جوړولو باور لري، په خپل اویا کلن تاریخ کې یې تر اوسه له شعارونو، لیکنو او ټولنیزو رسنیو کې له هشټاګونو چلولو پرته د خپلو موخو ترلاسه کولو له پاره عملاً کوم د پام وړ کار نه دی کړی.
دوی په شلمه پېړۍ کې په دې تمه وو چې د عربي نړۍ د سیکولرو او کمونستو حکومتونو پر ضد به په غونډو او شعارونو بریالي شي، خو په بشپړ ډول ناکام شول.
تحریریان و نه توانېدل چې په خپل اویا کلن تاریخ کې یو ځل هم قدرت ترلاسه کړي؛ د دوی لوی مشکل دا دی چې نه لکه د اخوان المسلمین او نورو اسلامي ګوندونو په څېر په انتخاباتي او سیاسي مبارزو باور لري او نه لکه د طالبانو او نورو جهادي ډلو په څېر په جګړه باور لري.
دوی په دې نظر دي چې ټولو حکومتي او غیر حکومتي خلکو ته تبلیغ وکړي او هغوی په سوال او زاریو خلافت منلو او اعلانولو ته چمتو کړي، خو دا کار په هیڅ ځای او هیڅ وخت کې عملي نه دی.
یوه خبره واضحه ده چې په اشغال شویو هیوادونو، سیکولرو او غیر اسلامي نظامونو کې اسلامي نظامونه او خلافتونه جوړول په سوال و زاریو، عدم تشدد او غیر سیاسي مبارزو نه راځي.
اوس چې په افغانستان کې ا.ا واک ته رسېدلی او د یو بشپړ اسلامي نظام جوړېدو په لور ګامونه اخلي، تحریریان په کې د ورانۍ او فساد اراده لري؛ دوی په افغانستان کې له لسیزو وروسته رامنځته شوی ثبات له ستونزو سره مخ کوي او ټوله هڅه یې دا ده چې افغانستان ته په کورني او بهرني سیاست کې ستونزې جوړې او کمزوری افغانستان له ګاونډیانو او نړۍ سره په ستونزه کې ښکېل کړي.
که رښتیا هم تحریریانو مبارزه کولای او د یو اسلامي خلافت د اعادې هیله یې درلودلای، نو دوی په عربي هیوادونو کې د مبارزې له پاره ښه میدان او فرصت درلود او کولای یې شول چې هلته مبارزه وکړي، خو نه! دوی هلته د اخوان پر ضد او برعکس روان وو او خلک یې غولول او اوس په افغانستان کې د ا.ا پر ضد تبلیغات کوي او د بې ثباتۍ او فساد جوړولو هڅې کوي.
حزب التحریر ته زما شخصي مشوره دا ده او دا ورته په خیر تمامېدلای شي چې له تبلیغاتو او فساد جوړولو لاس واخلي او ا.ا پرېږدي چې خپل کارونه پر مخ یوسي.