د ايران دولتي خبري آژانس «ایرنا» راپور ورکړی، چې د بابک شهبازي په نوم يو ايرانی وګړی، چې موساد ته په جاسوسۍ او اسرائیلي رژيم سره د امنیتي همکاریو په تور محکوم و، له قانوني مراحلو او د ايران د سترې محکمې له تایید وروسته نن ورځ اعدام شوی.
سرچينه وايي، شهبازي د یخچال او سړو خونو د سیسټمونو په ډیزاین او نصب کې کار کاوه او په داسې شرکتونو کې یې دنده ترسره کوله چې د ايران مخابراتو، پوځ او امنیتي ادارو سره تړلي وو.
راپور زياتوي، چې شهبازي له نورو اسرائیلي جاسوسانو سره پټې انلاین ناستې ترسره کړې وې، د موساد روزنه یې ترلاسه کړې وه او هڅه یې کوله چې د ايران د لوړپوړو چارواکو او ستراتیژیکو تاسیساتو په اړه حساس معلومات راټول او بیا یې اسرائیلو ته په لاس ورکړي.
په تېرو څو کلونو کې ایران او اسرائیل لسګونه ځله اعلان کړی، چې د یو بل د جاسوسي شبکو مخه یې نیولې ده او د دواړو لوريو ترمنځ دا سيالي لا هم روانه ده.