ایران د کرنې په برخه کې پانګونه کوي

د کرنې، اوبو لگولو او مالدارۍ وزارت وايي، په کابل کې د هېواد د بېلابېلو ادارو د مشرانو په ګډون یې له ایراني پانګه‌والو سره لیدلي او ایراني پانګه‌والو ژمنه کړې ده چې په افغانستان کې د کرنې په برخه کې پانګونه کوي. د کرنې وزارت څخه په خپره شوې خبرپاڼه کې ویل شوي، په دغه ناسته کې د کرنې، مالدارۍ، بڼوالۍ او صنعت د عملي کار او پانګونې په اړه مفصلې خبرې شوې دي. د ایران دکرنې او اقتصاد وزارت مرستیال څرګنده کړه، چې هېواد یې چمتو دی چې د افغانستان له خلکو سره د کرنې، زېر بناوو جوړولو، د بزګرانو د روزنې او د کرنې او مالدارۍ د کارپوهانو په برخه کې کار وکړي. دغه راز یې له افغان سوداګرو څخه وغوښتل، چې د ايران په بندرونو کې د اسانتياوو د رامنځته کولو او له ايراني خاورې څخه د مالونو د لېږد رالېږد په برخه کې همکاري وکړي. د کرنې وزارت د بوټو ساتنې او قرنطین رییس عتیق الله مسلم په دې غونډه کې ویلي، ایران د کرنې، مالدارۍ او بڼوالۍ په برخه کې ښه تجربه لري او اړتیا ده چې په ګډه کار وکړو او د یو بل له تجربو ګټه واخلو.:« د خوړو خوندیتوب په ټوله نړۍ او په ځانګړې توګه په ګاونډیو هېوادونو کې یوه ګډه مسئله ده، چې موږ کولی شو همکاري وکړو.د اسلامي امارت پالیسي د ټولو هیوادونو لپاره روښانه ده، موږ په کار کې کومه ستونزه نه لرو، تر ټولو مهمه خبره امنیت دی، چې امنیت تامین دی او که د بدیل معیشت په برخه کې کار وکړو، خلک به د نشه یي توکو کرکيلې ته زړه ښه نه کړي. که څه هم اوس مهال د نشه یي توکو کښت صفر دی، که چیرې موږ د هغې په بدیل کار وکړو، نو خلک به په راتلونکي کې دا کښت ونه کړي، موږ په دې برخو کې همکارۍ ته چمتو یو او د ایراني پانګوالو او ایراني حکومت څخه د پانګونې د همکارۍ هیله کوو.» د ایران د کرنې وزارت اجراییوي مدیر همتي د مالدارۍ، کرنې، اوبولګولو، بڼوالۍ، ښوونې او روزنې، د څارویو د نسل اصلاح او لبنیاتو د پروسس په برخو کې د پانګونې لپاره د ایران د چمتووالي په اړه خبرې وکړې او ډاډ یې ورکړ چې په دغو برخو کې د عملي کار پیل ته چمتو دي.