د ایران دولتي خبري اژانس ارنا وایي، چې د شنبې شپې ناوخته لسګونه ډرون بې پیلوټه ځانمرګي الوتکې او توغندي یې د اسرائیلو خوا ته توغولي دي.
ایران ویلي، چې دغه بریدونه یې په اسرائیلو د هغه برید د غچ اخیستنې په موخه کړي، چې اسرائیلو په دمشق کې د دوی پر قنسلګرۍ کړی و.
د ایران سپاه پاسداران انقلاب هم په یوې اعلامیه کې ویلي، چې دغه بریدونه د صهیونیستي رژیم د جنایتونو په ځواب کې د ایران د هوايي ځواکونو لخوا ترسره شوي دي.
بل لور ته د اسرائیلو د پوځ ویاند “دانیل هاګاري” په یوې خپره کړې اعلامیه کې ویلي، چې له ایرانه پر اسرائیلو شاوخوا ۲۰۰ډرون، کروز او بالستیک توغندي توغول شوي دي.
هغه زیاته کړې ده، چې د اسرائیلو او د هغې د متحدینو دفاعي سیسټم د توغندیو او ډرونونو زیاته برخه یې له منځه وړي دي.
د اسرائیلو د پوځ ویاند زیاته کړې، چې د دغه هېواد په جنوب کې یو ځای په نښه شوی، خو دغه “پوځي مرکز” ته کوم قوي زیان نه دی رسېدلی.
یو شمېر نړۍوالو رسنیو ویلي پر اسرائیلو د ایران له هوايي برید وروسته، د ملګرو ملتونو سرمنشي انتونیو ګوتېرېش په یوې اعلامیه کې د “سیمه ییز ویجاړونکي کړکېچ د خپرېدو د اصلي خطر” په اړه خبرداری ورکړ.
نوموړي پر اسرائیلو د ایران پراخ هوايي برید په کلکه غندلی او د دغو بریدونو د سملاسي بندېدو غوښتنه یې کړې ده. هغه له دواړو غاړو غوښتي، چې له زغمه کار واخلي.
د ملګرو ملتونو سرمنشي ټینګار کړی، چې هغه هر وخت ویلي چې “نړۍ بله جګړه نشي زغملی”.
امریکا، کاناډا، جرمني، انګلیستان، فرانسې او یو شمېر نورو هېوادونو هم د ایران دغه بریدونه غندلي دي، دوی ویلي چې د ایران داسې بریدونه به په سیمه کې سخت کړکیچ رامنځ ته کړي.
د دې ور اخوا د ایران پارلمان رییس “محمد باقر قالیباف” او د دغه مجلس نورو غړو د دغو بریدنو هر کلی کړی دی.
قالیباف دغه بریدونه د اسرائیلو لپاره یو درس ورکوونکې ضربه بللې او زیاته کړې یې ده، که اسرائیل او متحدین یې کوم غبرګون وښیي، نو د ایران پلان شوی ځواب به له دې هم دروند او زیات وي.
بل لور ته یو شمېر نړۍوالو رسنیو د اسرائیلي چارواکو له قوله راپورونه خپاره کړي، چې د ایران د بریدونو ترڅنګ د “عراق” او “یمن” هېوادونو لخوا هم د دوی پر خاوره بریدونه شوي دي.