د خیبر پښتونخوا باجوړ ولسوالۍ کې د یوې حکومتي اېمای-۱۷ ډوله چورلکې د لوېدو په پېښه کې د دوه پیلوټانو په ګډون پنځه تنه مړه شوي.
پاکستاني رسنیو د خیبر پښتونخوا د وزیر اعلی علي امین ګنډاپور له قوله لیکلي، چې یاده الوتکه د صوبایي حکومت له لوري باجوړ ته د مرستو د لېږد لپاره استول شوې وه.
ویل شوي، یاده الوتکه د خرابې هوا له امله لوېدلې ده.
د ویلو ده، چې باجوړ کې له تېرې شپې راهیسې شدید سېلابونه راوتلي، چې خلکو ته یې په درانه ځاني زیانونو سربېره پراخ مالي زیانونه هم اړولي دي.