طغیان او سرغړونه
په بغاوتګرو کې تر ټولو بده او ناوړه ځانګړنه طغیان او سرغړونه ده؛ او دا د هر قانون او حکم په وړاندې نه تسلیمېدل او په خپل جهالت ټینګار کول دي.
طغیان او سرغړونه د بغاوتګرو له خوا د ټولو ناوړه پېښو اصلي عامل دی چې د ملت، خلکو او وطن پر وړاندې یې کوي؛ دا چې ځینې خلک ځانونه یوازې د میدان سړي ګڼي او هیڅ شی او هیڅوک یې مخه نه شي نیولی.
همدا خام او بې بنسټه تصور سبب شوی چې ورځ تر بلې یې شرارت او فساد زیات شي او د دې اور لمبې یې نور ځایونه وسوځوي او بې شمېره زړونه داغداره کړي.
ځکه کله چې څوک په داسې مقام کې وي چې له ځان څخه لوړ څوک نه ګڼي او له ایمان، ملي غیرت او ویښ وجدان څخه هم بې برخې وي، نو څنګه به د معجزې تمه ولرو او څنګه به له هغوی څخه د خوښۍ ورځې وغواړو؟!هماغه د هرې کوڅې او بازار نوم آشنایان چې د منبرونو او تربیونونو شاته یې د ملت د حق غوښتنې غږ څو چنده لوړ وو او د وطن دوستۍ او میهن پرستۍ خبرې یې کولې، خو د پردې تر شا یې شرارت غوړېدلی وو او ځمکه او زمان یې له یو بل څخه نه شول جدا کولای.
هر څوک چې په هر ډول د دوی په وړاندې ودرېدل او د دوی په خلاف خبرې به یې وکړې، لکه د لوږې لیوه او د ځنګلي زمري په څېر به یې هغه او د هغه کورنۍ باندې برید وکړ او په دې خاوره کې به یې ورته ژوند تنګ او ساه اخیستل ناممکن کړل.
بغاوت کوونکي داسې لیوه صفته او پسه شانه خلک وو چې په ظاهره به یې یو مصنوعي او خندونکی حالت درلود، خو په پټه به یې د تزویر جامې له تن څخه ایستلې او د طغیان او سرکښۍ جامې به یې اغوستې.
جالبه دا ده چې همدا د شر او فساد خلک او د سرکښۍ او طغیان کوڅې اوسېدونکي، قانون جوړونکي هم وو او د هېواد او نورو چارو واک او اختیار یې په لاس کې وو.
دا ټول په مجموع کې، د دوی د لا زیات شرارت او نامحدود طغیان لپاره عوامل وو او دوی ځانونه ورځ تر بلې بېرحمه او ظالم ښودل.
خو د ظالم څراغ تر محشر پورې نه بلېږي؛ که و بلېږي، یوه شېبه بلېږي او بیا نور نه بلېږي.
الحمدلله، اوس هغه د بېنظمۍ ورځې هم تېرې شوې دي او د قانون استثنايي او تښتېدلي کسان د اصلاح په لاره راستانه شوي دي او ټول د شریعت او د هېواد د قانون په وړاندې برابر او وروڼه دي.
دا ټول د الهي عدل د ټینګښت او د خدای احکامو د پلي کولو او د ملت او دولت په شتمنیو کې د طمع نه لرلو برکت دی.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.