فحشا او منکراتانسان څومره چې په دنیوي چارو کې ډوبېږي او لاسونه یې په ناپاکیو او آلودګیو ککړېږي، په هماغه اندازه یې د وجدان پاکي ورو ورو تحلیل کېږي او په پای کې یې د معنویت پاکې اوبه له سرچینې وچېږي.
په داسې دوران کې، په بې حسۍ کې ویده شوي انسانان نور د ځان لپاره کوم حد او مرز نه پېژني او په مقابل کې هر څومره چې یې لاس رسېږي، هغومره جرمونه او منکرات ترسره کوي.
ځکه له دوی څخه د دنیا نه تېرېدل او د حساب او کتاب عالم ته ننوتل هېر شوي وي او شاید هم په عمل کې د بلې دنیا له شتون څخه انکار کوي.
په داسې حالاتو کې، چې د عیش و عشرت لپاره مختلفو اسبابو برابرېدل د دې لامل ګرځي چې انسان په فحشا او منکراتو کې نور هم ډوب شي او د بدیو او تیارو په زندان او منجلاب کې یې د اسارت موده لا هم اوږده شي.
بغاوتګران هغه کسان وو او دي چې په دې تکراري چرخه کې ولاړ، او لاسونه یې د هر ډول بدو اعمالو لپاره آزاد وو او د دې اعمالو د ترسره کولو زمینه یې د هیڅ قانون او عرف ته د نه پایبندوالي او له هیڅ سزا او تنبیه څخه د ویرې نه شتون له امله برابره شوې وه.
دا بې بندوباري چې د بغاوتګرانو په منځ کې وه، د دې سبب شوې وه چې فحشا او فساد په ټولنه کې عام شي او نور خلک هم د داسې اشخاصو له لیدلو او د هغوی له اعمالو څخه د ورته غوښتنو په فکر کې شي او د ګناه او معصیت په دې تاريکه او د زوال په لور روانه نړۍ کې داخل شي او په معاصیو کې ډوب شي.
ځکه خلک د دین او د خپلو واکمنانو د سلوک تابع دي او ټولنه هماغه لور ته ځي چې واکمنان او مشران یې هدایت کوي.
پخواني بغاوتګران چې هم د ملت او خلکو خاینان وو او هم یې د دولت دستگاه په لاس کې وه، په غیرمستقیمه توګه یې ټولنه او خلک د فحشا او منکراتو په لور سوق کړي وو او د دې فاجعې اصلي او کلیدي عاملان شوي وو.
تر دې مخکې هم، په ټولنه کې د فحشا د بسترونو برابرېدل او هغې ته د رسیدو او حصول لارې د اشغالګرو له خاموشه خو خبیث چلونو له امله یې د ټولنې اخلاقیاتو او دیانت زوال یې چټک شوی وو.
بغاوتګران د دې بې معنا کارونو په رأس کې وو او د دې میدان بې باکه مخکښان وو؛ خو الحمدلله اوس دغه بسترونه ټول شوي او شکمن ځایونه تړل شوي دي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.