د بلوڅو ازادي غوښتونکو له لوري د بلوچستان د بولان درې په ګڼو سیمو د سختو جګړییزو عملیاتو له پای ۲۴ ساعته وروسته، جزییات رسنیز کړل.
د بلوڅ ازادي غوښتونکو غورځنګ ویاند جنید بلوڅ رسنیو ته په استولې اعلامیه کې لیکلي، چې د بلوچستان د بولان درې په وروستیو جګړییزو عملیاتو کې يې نږدې ۸۰ کيلو متره خاوره تر خپلې ولکې لاندې راوستې وه او د بلوچستان زیاته برخه يې دوه ورځې سقوط کړې وه.
په اعلامیه کې د بلوڅ له قوله لیکل شویدي: « په دغو عملیاتو کې، چې دوه ورځې يې دوام وکړ، د بلوڅو ازادي غوښتونکو غورځنګ ۳۸۵ سرتېرو او ۱۲ له ځانه تېر بریدګرو برخه اخېستې وه؛ عملیاتو کې د کومانډو، استخباراتو او اطلاعاتي برخو مامورین هم شامل وو. د خپلو پراخو بریدونو په پایله کې مو د یو شمېر لوړ رتبه افسرانو په شمول ۷۸ پاکستاني سرتېري ووژل او لسګونه مو نور ټپیان کړل. ۸۰ کیلو متره خاوره مو تر ولکې لاندې راوستې وه او له عملیاتو وروسته بېرته خپلو سیمو ته ستانه شو»
جنېد همدا راز د بولان درې په وروستیو عملیاتو کې د خپلو ۱۳ سرتېرو وژل کېدل او د یو شمېر نورو ټپي کېدل هم تایید کړي دي.
پاکستاني رسنیو بیا د دغه هېواد د چارواکو له قوله خبر ورکړی دی، چې د بولان درې په بریدونو کې یوازې ۵ عسکر وژل شوي دي او د بلوڅو ازادي غوښتوونکو بریدونه یې په شا تمبولي دي.
د بلوڅو ازادي غوښتونکو غورځنګ ویاند جنید بلوڅ وایي، چې د بلوچستان د بولان درې عملیاتو دوه ستر اهداف درلودل او مونږ په دې اړه د پاکستان حکومت ته ښکاره پیغام ورساوه.
د بلوڅ په خبره: «یو هدف مو دا و، چې د پاکستان حکومت ته دا پیغام ورسوو، چې مونږ د هرې برخې او هر ښار د نیولو بشپړه وړتیا لرو؛ بل هدف مو دا و، چې د پاکستان پوځ د هېڅ ډول رحم وړ نه دی، ځکه دوی بلوچستان اشغال کړی دی او مونږ يې د ازادۍ مبارزه کوو.»
د راپورونو پر اساس په تېرو ۲۴ ساعتونو کې د بلوچستان ایالات په بېلابېلو سیمو کې په پاکستاني عسکرو، ټاکنیزو کمپاینونو او د معدن په شرکتونو ۳۴ بریدونه شویدي، چې ګڼ شمېر خلکو ته په کې مرګ ژوبله اوښتې ده.