د بلوڅ بېلتونپالې ډلې (BLA) ویاند، جیئند بلوچ په یوه خبرپاڼه کې ویلي، چې د دوی وسلهوالو د بلوچستان په کوهلو سیمه کې د پاکستاني ملېشو پر ضد دوه جلا جلا بریدونه کړي او پر لویه لار یې لنډمهاله پلټنه هم ترسره کړې ده.
نوموړي زیاته کړې، چې د BLA ځواکونو د مارچ په ۱۸مه، د کوهلو او سبی ترمنځ د برګ په سیمه کې پر لویه لاره د پلټنې پر مهال، د لیویز ځواک یو سرتېری ونیوه چې بیا وروسته یې بېرته خوشې کړ.
د ویاند په وینا، په هماغه ورځ پاکستاني ملېشو د موټرو او موټرسایکلونو کاروان په بڼه د سیمې د نیولو هڅه وکړه، خو ځواکونو یې کمین نیولی و او برید یې پرې وکړ، چې په ترڅ کې یې د پاکستاني ملېشو یو سرتېری هلاک او یو بل ژوبل شو.
د بلوڅ بېلتون پالې ډلې ویاند وړاندې ویلي، چې پرون د پاکستان پوځ یو ځل بیا برګ ته څېرمه سیمې ته د ننوتلو هڅه وکړه، خو ځواکونو یې پرې برید وکړ، چې په پایله کې یې پاکستاني ملېشو ته یې درانه ځاني او مالي زیانونه واړول او پوځ مجبور شو چې شاتګ وکړي.
د یادونې وړ ده چې، بلوڅ بېلتونپالو څو ورځې وړاندې د بلوچستان ایالت په نوشکي سیمه کې د پاکستاني پوځیانو د بسونو پر یوه کاروان د شوي سرتېري برید مسؤولیت هم منلی و.