بلوڅ بېلتون پالو د يوې اعلاميې په خپرولو سره ويلي، چې د پاکستاني حکومت له لوري د بنديانو د تبادلې وړانديز نه منلو او د دوی په خلاف د پوځي عملياتو د پيلولو له امله یې ټول نيول شوي ۲۱۴ پاکستاني پوځيان هلاک کړي دي.
د اعلامیې له مخې بلوڅ بېلتون پالو پاکستاني حکومت ته بار-بار وخت ورکړی، ترڅو د بنديانو په تبادلې غور وکړي او له پوځي عملياتو تېر شي؛ خو حکومت نه يواځې چې د تبادلې وړانديز نه دی منلی بلکې د بلوڅ بېلتون پالو په خلاف یې په دره بولان سيمه کې پراخ ځمکني او هوايي عمليات ترسره کړي، چې دې کار بلوڅ بېلتون پال غوسه کړي او په پايله کې یې نيول شوي ټول ۲۱۴ پاکستاني پوځيان هلاک کړي دي او دغه راز ۱۲ بلوڅ سرتېرو هم ژوند له لاسه ورکړی دی.
بلوڅ بېلتون پال زياتوي، پاکستاني حکومت چې کوم کسان ژغورل شوي يادوي، هغه دوی د خپلو اصولو له مخې خوشې کړي دي نه دا چې په پوځي عملياتو کې خوشې کړل شوي دي.
اعلاميه کې دغه راز راغلي، چې په دره بولان سيمه کې لا هم د پاکستاني حکومت پر وړاندې د بلوڅ بېلتون پالو له لوري درنه جګړه روانه ده او جزئيات به یې ډېر ژر له رسنيو سره شريک کړي.