بهرنيو چارو وزارت په يوه اعلاميه کې په لبنان د صهيونيستي اسرائيلو بريد وحشت ياد کړی او د صهيونيستي رژيم ياد بريد یې چې سلګونه عام وګړي پکې شهيدان شوي په کلکو ټکو غندلی.
د بهرنيو چارو وزارت اعلاميه کې راغلي:د افغانستان اسلامي امارت د بهرنیو چارو وزارت په لبنان کې د صهيونيستي رژيم وروستي وحشیانه بریدونه چې د ماشومانو او ښځو په ګډون یې سلگونه بې گناه وګړي شهيدان کړي، په کلکو ټکو غندي.
همدارنګه ياده اعلاميه کې راغلي چې: په غزه کې د صهيونيستي غاصب رژیم لخوا نسلوژنې ته پر وخت د جدي ځواب نه ورکول د دې لامل شوي چې رژيم د ټولې سيمې امنيت له گواښ سره مخ کړي.
بهرنيو چارو وزارت همدارنګه غوښتنه کړې چې نړیواله ټولنه باید عاجل مسؤولانه گامونه پورته کړي، ترڅو په لبنان او فلسطين او په ځانگړې توګه غزه کې د صهيونيستي رژيم د جنايتونو مخه ونيول شي او د ملکي وګړو خونديتوب په کې تضمين شي.