د افغانستان د بهرنیو چارو وزارت د م.م سرمنشي د وروستي راپور او امنیت شورا ته د سرمنشي د ځانگړې استازي د وینا په اړه توند غبرگون ښودلی او دغه راپور یې د افغانستان له اوسنیو حقایقو څخه د ملگرو ملتونو ناخبري ښودلې ده.
له یاد وزارت څخه په خپره شوې خبرپاڼه کې ویل شوي، د افغانستان اسلامي امارت د ملگرو ملتونو د سرمُنشي په وروستي راپور او امنيت شورا ته د افغانستان له پاره د سرمُنشي د ځانگړې استازې په وينا کې په هېواد کې د سراسري امنيت او ثبات د ټينگښت، اقتصادي پرمختگ، د نشهيي توکو د هراړخيز بنديز د انفاذ، د جبري را ستانه شوو هېوادوالو د استقبال، د طبيعي پېښو پر وړاندې پر وخت غبرگون او نورو برخو کې د اسلامي امارت د هڅو ستاينه؛ د افغانستان پر خلکو د بانکي او اقتصادي بنديزونو د ناوړو اغېزو درک او همدارنگه د ملگرو ملتونو له خوا د افغانستان له خلکو سره د بشري مرستو تداوم او د نيمه پرمختيايي مرستو لور ته گام اخيستل مثبت ارزوي.
د خبرپاڼې له مخې، په دغه راپور کې یو شمېر بېبنسټه تورونه هم پورې شوي دي.:«د ملگرو ملتونو په دغو او نورو راپورونو کې د يو لړ بې اساسه تورونو، د راپور چمتو کولو د غير علمي میکانېزم او له ماموريت خارج موضوعاتو ته د لاس ور وړلو لکه د مخدره موادو د بنديز په برخې کې د داخلي اختلاف، پېښو او موضوعاتو ته د قومي رنگ ورکولو، د عامه نظم او قانون د انفاذ هڅو ته د بشري حقونو د سرغړاوي او خپلسرو اقداماتو نوم ور کولو، د ځمکنيو واقعيتونو او تثبيت وړ ارقامو پر اساس د استناد کولو پر ځای پر بې بنسټه ادعاوو، مجهولو سرچينو او مخکېنيو ناسمو راپورونو استدلال، د خودساخته معلوماتو او د جنايي انفرادي پېښو د منحرف تعبير له لارې افغانستان په شخړې کې ښکېل هېواد د معرفي کولو او په دې توگه د وېرې د فضا د خپرولو او د څو مشخصو هېوادونو د بې بنسټه سياسي روايت تر اغېز لاندې افغانستان نورو هيوادونو ته د خطر د بالقوه سرچينې په توگه ورپېژندلو پر مواردو شديد اعتراض لري او د دې سپارښتنه کوي چې ملگري ملتونو په خپلو راپورونو او چلن کې د سطحیت او پلويتوب پر ځای د دقت او بې پرېتوب لاره خپله کړي.»
په خبرپاڼه کې ویل شوي، د افغانستان اسلامي امارت د اسلام د مبارک دين، د هېواد د استقلال او ملي منافعو په چوکاټ کې د ملگرو ملتونو د سازمان تر څنگ د نړۍ له ټولو هېوادونو سره د گډو گټو د تحقق او مشترکو اندېښنو ته د ځواب موندلو په پار په هر ځای او وخت کې رغنده او هدفمند تعامل ته پر خپلې ژمنتيا يو وار بيا ټينگار کوي.