کله چې د سرپرست حکومت د مخالفینو له لوري د بین الأفغاني مذاکراتو خبره او یادونه کېږي، له ټولو مخکې باید دا پوښتنه مطرح شي چې بین الأفغاني مذاکرات له چا سره او ولې وشي؟
د سرپرست حکومت مخالفین یو څو محدود او منفور افراد دي، ملت ته بې باوره دي، هویت او اجنډا یې نا معلومه ده، نه انسجام لري او نه هم واحده ملي اراده. د دغه مخالفو ډلو ترمنځ اصلاً هېڅ اتفاق او یووالی شتون نه لري، احمد مسعود، عطامحمد نور، خلیلي، محقق، اتمر، امرالله صالح، دوستم او نور مخالفین په خپلو منځونو کې ژور اختلافات لري.
کله چې مخالفي ډلې نه د ملت اراده پېژني او نه ملي منافعو ته ژمنې وي، د سیاسي مخالفینو په منځ کې انسجام نه وي، د ملت واقعي استازي نه وي او یو څو د شخصي ګټو غوښتونکي محدودې څهرې وي، نو آیا له دې خلکو سره مذاکره بین الأفغاني مذاکره ده!؟ له دغسې ډلو او څهرو سره مذاکره په هر نوم چې وي، د وخت ضیاع ده.
له سیاسي مخالفینو سره مذاکرات هېڅ معقولې نتیجې ته نه رسېږي، ځکه دوی بې واکه دي، د هېچا نمایندګان نه دي، نو له داسې ډلو او افرادو سره مذاکره بې ثمره، د وخت ضیاع او هغه افرادو ته د شخصي ګټو د تپلو حق ورکول دي، چې لسیزې یې هېواد چور او تالان کړ.
مخالفي ډلې او سیاسي سوداګر د بین الأفغاني مذاکراتو په نوم د افغانستان له شته وضعیت سره په څرګند ټکر کې واقع غوښتنې لري، ځکه خو دوی د یو مشروع حاکمیت په وړاندې بغاوت کړی او نا مشروع غوښتنې منعکسوي. په بل اړخ کې سیاسي مخالفین غواړي د بین الأفغاني مذاکراتو په نوم خپل تېر تاریخ په دې نامه سپین او له خلکو هېر کړي او د خپل سیاسي حیثیت اعاده وکړي.
دا واقعاً د پوښتنې وړ ده چې د یو منظم حاکمیت په شتون او د ملت په خپلواک اقتدار کې ولې مخالفي ډلې د خپلو ناروا شعارونو د بدرګه کولو لپاره بین الأفغاني مذاکرات بهانه ګرځوي او بیا له دې لارې د یو مقتدر مرکزي حکومت، حاکمیت ننګوي!؟
بین الأفغاني مذاکرات هغه مهال منطقي دي او نتیجه ورکوي چې مخالفین رښتیا هم د یو معلوم، ثابت او حق جهت په توګه واقع وي، د ملت رښتینې استازولي وکړي، په خپلو تصامیمو کې خپلواکي ولري، د پردیو استخباراتي کړیو ښکار نه وي، د ولس اراده تمثیل او یو شمېر نور امورات یې سرته رسولي وي، خو مقابل لوری کاملاً د دې برعکس دی، دوی د بین الأفغاني مذاکراتو له نامه فقط د دې لپاره ګټه اخلي چې د ملي حاکمیت او ملي ګټو پر ضد یو خنډ جوړ شي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.