د افغانستان برېښنا شرکت عمومي اجرائیوي رئیس ډاکټر عبدالباري عمر د ترکیې هېواد ماروېسټ ونډه وال شرکت مسؤلینو سره په کتنه کې ویلي، چې اوس افغانستان کې د پانګونې لپاره ټول شرایط برابر او د بشپړې روڼتیا له مخې ټولې آسانتیاوې رامنځته شوې دي.
د افغانستات برېښنا شرکت د خبرپاڼې له مخې، د یاد ترکي شرکت مسؤلینو د افغانستان برېښنا شرکت عمومي اجرائیوي رئیس سره دبرېښنا تولید او وېش نوې ټیکنالوژۍ په اړه خبرې کړي او پانګونې ته یې لیوالتیا ښودلې ده.
ښاغلي ډاکټر عمر د یاد ترکي شرکت مسؤلینو ته ډاډ ورکړی، چې د دوی تخنیکي څېړنو او ارزونو لپاره به ورته هر ډول آسانتیاوې د افغانستان برېښنا شرکت له لورې رامنځته شي.
د برېښنا شرکت د خبرپاڼې له مخې، هېواد کې د برېښنا تولید برخو کې د پانګونې او شته فرصتونو پېژندنې ملي کانفرانس له جوړېدو راهیسې ګڼو نړیوالو او ملي پانګوالو پانګونې ته لیوالتیا ښودلې، چې ځینو سره یې د همکارۍ تړونونه هم لاسلیک شوي دي.