د افغان حکوکت د کډوالو چارو وزارت ويلي، په ترکيه کې ۲۲ تنو افغانانو هغه مهال خپل ژوند له لاسه ورکړ، چې د دوی کښتۍ ډوبه شوه
ياد وزارت د يوې اعلاميې په خپرولو سره ويلي، چې دغه پېښه د “چناک قلعه” ولايت کې رامنځته شوې ده.
په اعلامیه کې زیاته شوې ده: ” په کښتۍ کې ۴۶ تنه سپاره و، چې له جملې یې ۲۲ تنو خپل ژوند بایللی، څلور تنه افغانان ژغورل شوي او یو شمېر نور اوس هم نادرکه دي”.
په اعلامیه کې نه دي ویل شوي، چې یاد کسان د افغانستان د کومو ولایتونو دي او دغه پېښه کله رامنځته شوې ده.
د افغان کډوالو د کښتۍ د ډوبېدو دغه پېښه په داسې حال کې رامنځته شوې، چې په دې وروستيو کې د ترکیې په زندانونو، توقيف ځايونو او کمپونو کې له افغان کډوالو سره د ناوړه چلند راپورونه ورکړل شوي دي.
بل لور ته یو شمېر هغه افغانان، چې د سختیو ورځو د ګاللو وروسته له ترکې او نورو هېوادونو څخه افغانستان ته بیرته راغلي وایي، چې په خپل هېواد کې هره سختۍ په ځان ومنی خو نورو هېوادونو ته د مزدورۍ په موخه مه ځئ.
د دوی په وینا، چې د نورو هېوادونو پولیسو او مسولینو له خوا په افغانانو هېڅ ډول رحم نه کیږي او هیڅ انساني کرامت په نظر کې نه نیسي.
دوی له نورو افغانانو وغوښتل، چې په خپل هېواد کې په لږ څه قناعت وکړي، خو نورو هېوادونو ته دې په قاچاقي لارو نه ورځي.