د ترکیې د بهرنیو چارو وزارت د یکشنبې په ورځ اعلان وکړ چې د ملګرو ملتونو سازمان ته یې د ۵۲ هېوادونو او دوو سازمانونو له خوا لاسلیک شوی لیک استولی چې پکې غوښتل شوي چې پر اسرائیلو د وسلو د پلورلو مخه ونیسي.
د ترکیې د بهرنیو چارو وزیر هاکان فدان چې د ترکیې او افریقا د همکارۍ په سرمشریزه کې د ګډون لپاره جیبوتي ته تللی، په یوه خبري کنفرانس کې ویلي: « موږ په شریکه په یو لیک کې له ټولو هېوادونو غوښتي چې پر اسرائیلو د وسلو او مهماتو له پلورلو ډډه وکړي. موږ دا لیک، چې ۵۴ لاسلیک کوونکي لري، د نومبر په لومړۍ نېټه ملګرو ملتونو ته سپارلی»
فدان ویلي “موږ باید په هر ځای کې یادونه وکړو چې پر اسرائیلو د وسلو پلورل په نسل وژنه کې د ګډون معنا لري.”
د فرانسې خبري آژانس د خبر له مخې سعودي عربستان، برازیل، الجزایر، چین، ایران او روسیه هغه هیوادونه دي چې دغه لیک یې لاسلیک کړی دی. د دغه لیک دوه نور لاسلیک کوونکي عرب لیګ او د اسلامي همکاریو سازمانونه دي.