یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.
د غربي نړۍ يو فرمايشي او د هرې ناروا او اسلام ضد کړنې مهم سنګر او سازمان، چې ظاهراً يې نوم ملګري ملتونه دی، هر کال د نړۍ پرمخ د اتيا سلنه هيوادنو د ولسمشرانو، لومړیو وزیرانو او يا د هغوی د استازو کوربتوب ترسره کوي.
ددې سازمان مرکزي دفتر د امريکا په نیویارک ښار کې ده؛ د نوموړي سازمان سږنۍ سرمشريزه په داسې حال کې ترسره کېده، چې تېري يوولس مياشتې د بشري تاريخ په تېر، اوس او راتلونکي کې د نه تکرار کېدونکې نسل وژنې شېبې او حالت روان دی.
تېرې يوولس مياشتې د خپل حق او خپلې ځمکې ځخه دفاع کوونکي د صهيونيستي رژيم لخوا هره ورځ د قيامت په شان له يو حالت سره مخ دي، ډوډۍ پرې بنده شوې، د څښاک اوبه نه لري، ماشومان، ميرمنې، سپين ږيري، روغتونونه، ښوونځي او هر هغه څه چې د همدې تش په نامه سازمان د ۱۹۷۰ کال د تصویب شوي قانون په اساس په جګړې رعايت او خونديتوب مهم ده، تر بمبار لاندې دي؛ خو بيا هم د همدې کړنو ترسره کوونکی د نسل وژنې اول ترهګر او قاتل د محکمې او خپلو ظلمونو د ترسره کولو په ځای ددې سازمان د يو ويناوال حق لره او په سټیچ یې په لوړ سر او غږ خبرې ترسره کولې.
د بنيامين نتانياهو د خبرو پرمهال د همدې ديکتاتور قاتل تر آمر او کنټرول لاندې وحشي ځواکونو يې په اشغالي فلسطين او لبنان کې سلګونه بې دفاع فلسطینان او لبنان له خاورو سره خاورې کړل.
دې سازمان ته په کار وه، چې نتنياهو ته د وينا او چکچکو کولو په ځای یې هغه د هغوی لخوا اسلام ضد جوړې شوې هاګ محکمې ته معرفي او د کړيو وحشتونو او نسل وژنې سزا یې ورکړې وای.
خو بنيامين نتانياهو نه دا چې ظالم، قاتل، او د نسل وژنې مشر ونه پېژندل شو، بلکې نوموړي ته د تش په نامه د اسلامي نړۍ ضد سازمان لخوا آرام بستر او فرصت په لاس ورکړل شو، کوم چې نوموړي له هغه سټېج څخه خپل ابدي دښمن ايران ته ګواښ وکړ چې د صهيونيستي رژيم په پلازمېنې بريد په ځواب کې به تهران کې دننه برید او اهداف په نښه کړي.
ملګرو ملتونو له دې ډرامې او د نسل وژنې د يو قاتل مشر ته د خوندي بستر او د وينا وخت ورکولو سره ثابته کړه، چې دا ملتونه او دې ته ورته نور سازمانونه يوازې او يوازې د مسلمانو د تضعیف، تجرید او د کفري نړۍ لپاره د غلامۍ ترسره کولو لپاره جوړ دي، دا سازمانونه هيڅ کفري يرغلګر، وحشت ترسره کوونکي او قاتل ته سزا يا هم د خپلو ناسمو کړنو غندنې او مخنيوی ترسره کولو وړتيا هم نه لري او لا هم د خوندي بستر برابرولو لپاره اقدامات ترسره کوي.